Ахсынньы 16-17 күннэригэр, Нам улууһугар, хапсаҕайга сүгүрүйээччилэр бука бары кэтэһэр, өрөспүүбүлүкэбит саамай бэлиэ Кубогын иһин хабыр-хапсыһыылары көрүөхпүт. Хапсаҕай улахан түһүлгэтигэр Сахабыт сирин аар-саарга аатырбыт уон бастыҥ хамаандалара тахсыахтара.
Хапсаҕай Кубогын иһин сүрүн күрэхтэһии быйыл XXVI-с төгүлүн ыытыллар. Манна Үөһээ Бүлүү, Мэҥэ Хаҥалас, Бүлүү, Уус Алдан, Чурапчы, Хаҥалас, Таатта, Кэбээйи, Сунтаар, Нам улууһун хамаандалара уун-утарыта көрсүһүөхтэрэ. Бу күрэхтэһии Намҥа бүтэһигин 2016 сыллаахха ыытыллан турардаах, онно Үөһээ Бүлүү улууһа бастакы, иккис Дьокуускай уонна үһүс Сунтаар улууһа буолбуттара.
Устуоруйа быыһын сэгэтэн көрөр эбит буолла, хапсаҕай Кубогын иһин турнир 1998 сыллаахха саҕаламмыта. Бу сыллар усталарыгар Чурапчы улууһа үс төгүл Кубок хаһаайынынан буолбута, ити 2004, 2009 уонна 2011 сылларга, 2002 сыллаахха – 2 миэстэ, 2010 сыллаахха – 2 миэстэ, 2015 сыллаахха – 2 миэстэ, 2017 сыллаахха – 3 миэстэ буолуталаабыта. Куһаҕана суох көрдөрүү!
Икки тустуу успуордун маастара, Үөһээ Бүлүү улууһун саамай титулованнай бөҕөһө Айаал Романович Павлов быйылгы хамаанда састаабын билиһиннэрдэ:
Уолаттарга
50 киилэҕэ
- Уйусхан Халгаев;
55 киилэҕэ
- Виталий Мордовской;
62 киилэҕэ
- Анатолий Иванов;
70 киилэҕэ
- Ариан Оконешников;
80 киилэҕэ
- Тулуйхан Никитин;
80-тан үөһэ киилэҕэ
- Ньургун Новгородов.
Эр дьоҥҥо
57 киилэҕэ
- Сергей Санников;
65 киилэҕэ
- Александр Неустроев;
75 киилэҕэ
- Владимир Афанасьев;
85 киилэҕэ
- Анатолий Сивцев;
95 киилэҕэ
- Дьулустан Калачев;
95 киилэттэн үөһэ
- Никита Софронов.
Бэтэрээннэргэ
60 киилэҕэ
- Иван Друзьянов;
70 киилэҕэ
- Айаал Павлов;
80 киилэҕэ
- Александр Иванов;
90 киилэҕэ
- Андрей Васильев;
90 киилэттэн үөһэ
- Владимир Абрамов.
Инньэ диэн туран, Эҥсиэли хочото уолаттарбыт кыайыыны-хотууну тосхойуохтун. Икки атахтаахтан бүдүрүйбэтэх биллиилээх бөҕөс, Аҕа дойду Улуу сэриитин кыттыылааҕа Никита Докторов-Бычырдаан: “Хапсаҕай түһүлгэлээх этэ! Сахалар хапсаҕайдаах этибит!”, — диэн этиитинэн түмүктүүбүн.
Сэмэн Жендринскэй. Хаартыска ааптар тус архыыбыттан