Күн уотугар харааччы сэиппит эгил-тэгил уҥуохтаах оҕолор бадараан мэһийэр дьаамаҕа тимир күрдьэҕинэн буор быраҕаттыыллара. Ону көрөн Кирилл Спиридонович Попов оҕонньор кумах тэптэрэн биэрэрэ эбэтэр уу куттарара. Ол кэнниттэн оҕуһун сайдаан, хотуогунан бадарааны мэһийтэрбитинэн барара.
Ити оҕуһу оҕолор бары олуһун хай ҕыыллара. Кини күнү быһа биир сиргэ эргийэрэ уонна элбэх баҕайы бадарааны мэһийэн биэрэрэ. Онтон оҕолор кирпииччэлэрин үктүүллэрэ.
Инбэлиит Николай Алексеевич Бушуев звенотугар Попов оҕонньортон ураты сэттэ үөрэнээччи уонна биэс дьиэ хаһаайката бааллара. Кинилэр Субуруускай аатынан сопхуос Болтоҥотооҕу отделениетыгар 1969 сыл сааһыгар саҥа түһүлгэни тэриммиттэрэ. Онно кирпииччэ түһэрэр майдаан оҥостуммуттара уонна кирпииччэни уурар-харайар сарай тутан кэбиспиттэрэ.
Бэһискэ, алтыска үөрэнэр оҕолор Миша Ефремов, Сеня Догдонов, Елисей Павлуцкай, Савва уонна Ганя Картузовтар буору мэһийсэллэрэ. Үрэхтэн киирэн уу баһан таһаараллара. Уонна халыыпка түһэрэн кирпииччэ оҥороллоро, майдаан тэлгэһэтигэр күн уотугар куурда-хатара кэккэлэтэллэрэ.
Оҕолор сынньалаҥ быыһыгар сөрүүн, сылаас Таатта үрэх чүөмпэтигэр сөтүөлээн чомполоноллоро. Арыт көрдөөх оонньууну тэрийэн сүүрэллэрэ-көтөллөрө. Кинилэри кирпииччэ үктүүр ньыматыгар үөрэтэр Николай Алексеевич оҕолоругар арыт көрүдьүөс кэпсээннэри сэһэргиирэ уонна куруутун сонун-нуомас кэһиилээх кэлэр буолара. Эдэр кирпииччэһиттэр, Елена Соловьева, Марфа Бассынаева курдук элбэх кирпииччэни түһэриэхтэрин баҕараллара. Буолумуна даҕаны, Елена Назаровна 5000, Марфа Максимовна 6500 устуука кирпииччэни туттараллара эбээт.
Болтоҥолор эрэ буолбакка, ыаллыы отделение дьоно оҕолору хайҕыыллара, кинилэргэ улаханнык махтаналлара. Бэс уонна от ыйдарыгар 30000 тыһыынча оннугар 30400 устуука кирпииччэни бэлэмнээбиттэрэ. Онтукларын хаачыстыбатын дьон дьоһун диэн сыаналаабыттара.
Оччотооҕуга нэһилиэккэ сүүрбэччэ ыал саҥа дьиэҕэ көһөн киирии үөрүүтүн бэлиэтээбитэ. Онно аҕыс кылаастаах оскуола, оҕо саада, дьааһылата, икки медпункт, олохтоох кулууп, маҕаһыыннар о.д.а. уопсастыбаннай тэрилтэлэр бааллара. Олор оһохторо ити оҕолор оҥорбут кирпииччэлэриттэн тутуллубуттара.
Оҕолор барахсаттар кэлин хас эмэ сыллар усталарыгар наар тиийэннэр кирпииччэҕэ үлэлииллэрэ уонна наар үчүгэйдик үөрэнэргэ кыһаналлара.
Сэмэн ЖЕНДРИНСКЭЙ