Биир дойдулаахпыт, олимпиец Павел Пинигин бүгүҥҥү төрөөбүт күнүнэн сибээстээн, ааҕааччыларга биллиилээх бөҕөс ыспартыыбынай олоҕун биир умнуллубат түгэнин кылгастык кэпсиэхпитин баҕарабыт.
1973 сыл. Көҥүл тустууга ССРС сүүмэрдэммит хамаандатын 20 саастаах чилиэнэ Павел Пинигин аан дойду Кубогын иһин күрэхтэһиигэ дойдутун чиэһин ситиһиилээхтик көмүскээбитэ.
Нью-Йорк “Медисон сквер-гарден” уораҕайын “Фелт-форум” саалатыгар финальнай көрсүһүүгэ бэйэлэрин Гейбл-лэригэр “ыалдьа” тыһыынчанан американецтар мустубуттара. Планета бары улахан түһүлгэлэригэр кыайтарыыны билбэтэх, 1971 сыллаахха аан дойдуга бастыыр иһин күрэхтэһиигэ алтата тустан алта ыраас кыайыыны суруммут олимпиада чөмпүйүөнэ Дэн Гейбл 30 мүнүүтэ устата тохтоло суох үрдүк тэтимнээхтик тустар, ураты үрдүк тиэхэньикэлээх тустуук этэ.
Оттон Павел кыраныысса таһыгар бастакы тахсыыта этэ. Улахан түһүлгэҕэ бастакы буһуутун-хатыытын дьэ ити аатырбыт Гейбл-лиин көрсүһүүнэн саҕалаабыта.
Свисток чыһыырбыта, 40-с сөкүүндэтигэр уолбут, Гейбл уҥа илиитин анныгар чаҕылҕанныы утары киирээт, “ныроктаабыта”. Элбэх биллиилээх Сэбиэскэй бөҕөстөр Гейбл-лиин тустубуттара эрээри кинини утары бу албаһы ким да тутта илигэ. “Бүтүн Америка киэн туттуута” күүпэтэх албаһыгар түбэһэн өрүттүбэккэ сууллубута. Бэрдин бэрт тимир ытарчаттан кыл мүччү куоппута. Судьуйалар, олус өр сүбэлэһэн баран, дебютаҥҥа 2 эрэ баалы биэрбиттэрэ!
Ити кэнниттэн уон сыл буолан баран Павел: “Олус ыарахан тустуу этэ. Киһи итинник күүстээх буоларын билбэт этим”, — диэн ахтыбыта. “Эр санаа күүстээх утарылаһааччылары кытта көрсүһүүгэ эрэ иитиллэр. Кыайтарар да буоллаххына кэннигинэн кэхтимэ, оччоҕуна эн элбэҕи сүүйүөҥ. Хаһан баҕарар күүстээх тустууктары кытта көрсүһэргэ дьулус. Кинилэр кыайыы ханна саһан сытарын чопчу көрдөрүөхтэрэ”. Дэн Гейбл ити этиитин Павел Пинигин бэйэтигэр кимтэн да ордук иҥэриммитэ.
1983 сыллаахха алтынньы 24 күнүгэр, Дьокуускайга Саха сирин тыһыынчанан успуорду таптааччылара ССРС успуордун үтүөлээх маастара Павел Павлович Пинигини улахан успуортан тренерскэй үлэҕэ чиэстээн-бочуоттаан атаарбыттара. Онно ССРС көҥүл тустууга кылаабынай тириэньэрэ Иван Ярыгин, Украина кылаабынай тириэньэрэ Алексей Атаманов, аан дойду чөмпүйүөнэ Анатолий Прокопчук, педагогическай наука хандьыдаата Олег Юшков ыалдьыттаабыттара.
Ити иннинэ олимпиец Роман Дмитриев өссө биир үөрүүлээх сонуну иһитиннэрбитэ: Павел алтынньы 12 күнүгэр Бакуга ССРС Сэбилэниилээх Күүстэрин көҥүл тустууга күрэхтэһиитигэр кыттан чөмпүйүөн үрдүк аатын ылбыта. Урут кини ыспартыыбынай биографиятыгар бу титул эрэ сурулла илигэ. Ити буолар олимпийскай характер!
Сэбиэскэй успуорт албан аатын күөрэччи көтөхсүбүт ньургун Павел Павловичка, биир дойдулаахтара күн бүгүнүгэр диэри Судаарыстыбаннай үлэтигэр-хамнаһыгар үрдүк ситиһиилэри, тус олоҕор дьолу-соргуну баҕараллар.
Сэмэн ЖЕНДРИНСКЭЙ