Ааспыт нэдиэлэҕэ 55 сыллаах үбүлүөйүн бэлиэтээбит улууспут биир тумус туттар “Кэскил” уһуйааныгар хаһыакка сурутуу ыыта тиийэ сырыттым. Сэбиэдиссэй Надежда Егоровна Федорова үөрэ-көтө көрүстэ.
Эрдэттэн бэлэмнэммит сырдык, ыраас, киэҥ саалаҕа киирэн сурутуубутун саҕалаатыбыт. Үлэһиттэр олус бэрээдэктээхтик биир-биир чугаһаан кэлэннэр ааттарын-суолларын, аадырыстарын этэ-этэлэр суруттарбытынан бардылар.
Манна даҕатан эттэххэ “Кэскил” уһуйаан кэлэктиибэ хаһыаты кытары үлэлэһэр баҕалаахтарын биллэрдилэр. Тэрээһин арааһын, истиҥ көрсүһүүлэри, күрэхтэһиилэри, куонкурустары, викториналары ыыталларын, үлэлэрин кэҥэтиэхтэрин, өрөспүүбүлүкэ олохтоохторугар сырдатыахтарын баҕаралларын эттилэр.
Итини таһынан уһуйаан үлэһиттэрэ хаһыаты илиилэригэр тутан эргитэ сылдьан ааҕыахтарын, баҕардахтарына иккистээн ылан көрүөхтэринр уонна онно санааларын үллэстиэхтэрин, хаһыаты кытары сибээһи ыкса тутуохтарын баҕарара бу да сырыыга көһүннэ.
“Аныгы үйэ оҕото ийэ, аҕа бэлэмигэр олорор. Улахан олоххо бэлэмэ суох тахсар. Майгыта-сигилитэ атын, кыраттан санаалара түргэнник түһэр, тулуура суохтар, уйулҕалара чараас. Итинтэн сиэттэрэн мин оҕону киэҥ көҕүстээх, тулуурдаах, уһуну-киэҥи толкуйдуур, олоҕу сыаналыыр буоларга иитэр-үөрэтэр, сирдиир матырыйааллары хото таһаараргытыгар баҕарабын,” — диэн Надежда Егоровна санаатын үллэһиннэ.
Күн бүгүн үбүлүөйдээх дьылларыгар таһаарыылаахтык, үтүө суобастаахтык үлэлии сылдьар кэлэктиип тутаах үлэһиттэрэ, сэбиэдиссэйи хаһаайыстыбаннай чааска солбуйааччылар Зинаида Гаврильевна Охлопкова, Марианна Афанасьевна Кривошапкина, медицинскэй үлэһит Анна Николаевна Коркина, гигиена инструктора Венера Петровна Трофимова, оҕолорго минньигэс ас астааччы повардар Эльза Семеновна Игнатьева, Валерия Валентиновна Гуляева, Александра Семеновна Дьячковская, Варвара Егоровна Моттуева, өр сыл бэриниилээхтик үлэлээбит иитээччи көмөлөһөөччүлэрэ Розалия Семеновна Попова, Елена Семеновна Степанова, Айталина Викторовна Дьяконова, Венера Петровна Трофимова, Нюргуяна Петровна Гуляева, харабыллар Филипп Николаевич Ефремов, Егор Егорович Семенов, Иван Сидорович Христофоров, Алексей Викторович Егоров уо.д.а. буолаллар.
Түмүктээн эттэххэ, “Кэскил” уһуйааҥҥа сурутуубут табылынна. Тиийиэхпититтэн көрсүһүүнү таһымнаахтык тэрийбит уһуйаан сэбиэдиссэйигэр Надежда Федороваҕа, исписэлиистэригэр, болҕомтолорун ууран кэпсэтиигэ кыттыбыт, хаһыакка суруппут бары ааҕаачыларбытыгар түгэнинэн туһанан дириҥ махталбытын тиэрдэбит.
Сэмэн ЖЕНДРИНСКЭЙ