Алтынньы 25 күнүгэр “Оскуолатааҕы Кыайыы мусуойа” Бүтүн Арассыыйатааҕы сийиэс сабыллар үөрүүлээх чааһыгар наҕараадалааһын сиэрэ-туома ыытылынна.
Манна туох даҕаны мөккүөрэ суох, буойун-учуутал Иван Павлов аатынан Чурапчы орто оскуолатын уонна Дьокуускайдааҕы Оҕо киинин хамаандалара “Улахан дойду устуоруйата” Бүтүн Арассыыйатааҕы куонкурус муҥутуур кыайыылаахтарынан буоллулар.
Кыайыы Мусуойун пресс-сулууспата иһитиннэрбитинэн, маннык улахан тэрээһиҥҥэ 300-кэ мусуой көхтөөх кыттааччылара Дойду үгүс эрэгийиэннэриттэн муһуннулар. Саха сирин үөрэнээччилэрэ “Аҕа дойду Улуу сэриитин Дьоруойдара уонна дивизиялара”, “Оскуола мусуойдарыгар холбоһуктаах үөрэхтээһин бырайыактар” диэн номинацияларга бэйэлэрин тустаах бырайыактарын билиһиннэрэннэр бастыҥнар ахсааннарыгар киирдилэр.
“Бу дьыл устата куонкуруспут кыттааччыларын ахсаана 2000 киһиэхэ тэҥнэстэ – манна үөрэнээччилэр, учууталлар, үөрэх тэрилтэлэрин мусуойун көхтөөх үлэһиттэрэ киирэллэр. Интэриэһинэй, сонун үлэ ааптардара “Оскуолатааҕы Кыайыы мусуойа” уһун кэмнээх бырагыраамма сийиэһин үбүлүөйүнэй сылыгар дэлэгээт быһыытынан Дойдубут тэбэр сүрэҕэр ыҥырыллан кэллилэр”, — диэн Кыайыы Мусуойун үлэһиттэрэ эттилэр.
Икки күн устата сийиэс кыттыылаахтара, үөрэнээччилэр уонна учууталлар бэйэлэрин уопуттарын үллэһиниллэр, бэйэлэрин мусуойдарын баай-талым мунньунууларын туһунан сэһэргээтилэр, араас таһымнаах аахсыйаларга, маастар-кылаастарга кыттыыны ыллылар. Тэрээһин бүтэһик күнүгэр, Кыайыы Мусуойун Оҕо уопсастыбаннай сэбиэтин аһаҕас мунньаҕа ыытылынна.
Сийиэс түмүгүнэн, Дойду 53 эрэгийиэниттэн мустубут үөрэнээччилэрэ уонна учууталлара ол иһигэр Беларуссия, Казахстан, Хотугу Корея, Кыргызстан киирбит этиилэри, санаалары бигэргэттилэр. Холобура, үөрэнээччилэр “Разговоры о важнов” уруоктары ситэрэн биэрэргэ итиэннэ “Россия – мои горизонты” тиэмэҕэ оскуола мусуойун сайдыытыгар саҥа тиэмэлэри эбэргэ этии киллэрдилэр, оттон учууталлар Дойдубут бары үөрэҕин кыһаларыгар “Оскуолатааҕы Кыайыы мусуойа” бырагырааммаҕа кыттыһарга ыҥырдылар.
Сэмэн ЖЕНДРИНСКЭЙ