Клубникалаах бананнаах смузи
Бу смузига саахары кутумуохха сөп, үчүгэйдик буспут бананы ыллахха сөп буолар.
Наада:
- 500 грамм сибиэһэй эбэтэр тоҥ клубника;
- 2 банан;
- 500 мл үүт.
Бастаан блендерга клубникалаах бананы эрийтэрэбит, онтон үүтү кутан баран, эмиэ эрийтэрэбит. Олус минньигэс уонна тотоойу смузи буолар.
Кивилээх смузи
Бу — экзотическай көрүҥ смузи. Ураты пикантнай амтаннаах уонна кыра аһыылаах буолар.
Наада:
- 2 устуука сиппит киви;
- 20 грамм саахар;
- 400 мл үүт.
Киви хаҕын хастыыбыт. Үүтү эрдэттэн тымнытабыт. Ингредиеннэри блендерга кутан, 2-3 мүн эрийтэрэбит.
Отон арааһыттан смузи
Биһиэхэ тоҥоруллубут отон араас көрүҥэ наада. Маҕаһыынтан бэлэм отоннору ылыахха сөп, вишнялаах, малиналаах уонна моонньоҕонноох бэлэм пакеттаахтар атыыга баар буолаллар. 2 порцияҕа 200 грамм отон уонна 150 грамм кефир, 10 грамм саахары эбиэххэ сөп. Барытын блендергэ эрийтэрэбит. Кефиры эрдэттэн тымнытан куттахха, киһини сөрүүкэтэр астык смузи буолар.
Сельдерейдээх, оҕурсулаах диетическэй смузи
Бу смузины ырарга туһаналлар. Киһини өр кэмҥэ тот сырытыннарар, ону тэҥэ биир да калорийа суох.
Наада:
- 100 грамм сельдерей;
- 1 орто сибиэһэй оҕурсу;
- Дьаабылыка аҥаара;
- 10 грамм кииһилэ;
- 200 мл минеральнай уу эбэтэр 1%-наах кефир
Манна чиа уонна лен сиэмэтин эбэн биэриэххэ сөп. Барытын кубиктыы быһан, кииһилэни бытарытан, уубутун биитэр кефирбитин эбэн блендердиибит. Сиэмэлэри үрдүгэр таммалатабыт.
Спортсменнарга аналлаах протеиннаах смузи
Бу ырысыапка от үүтүн эбэтэр кефири, ону таһынан эбиэс көмнөҕүн (овсянай хлопья), отон миксын уонна бананы туһаныҥ.
Наада:
- 80 грамм отон миксэ (холобур, черника уонна малина);
- 1 дьаабылыка;
- 1 банан;
- 50 мл от үүтэ;
- 80 грамм кефир;
- 30 грамм түргэнник буһар эбиэс көмнөҕө
Ингредиеннэри барытын кутан блендердиибит. Бу смузи элбэх клетчаткалаах, белоктаах уонна углеводтаах буолан, киһи оһоҕоһугар туһалаах.