Күн-бүгүн Саха сиригэр Искэн ыарыыттан көмөлөһөр амбулаторнай 17 киин үлэлиир – Дьокуускай 1 №-дээх поликлиникатыгар, Дьокуускайдааҕы Мэдиссиинэ киинигэр, 2 уонна 3 №-дээх куорат балыыһаларыгар, Мэҥэ Хаҥалас, Алдан, Мииринэй, Нерюнгри, Ньурба, Бүлүү, Томпо уонна Чурапчы оройуоннарын киин балыыһаларыгар диэн СӨ Ил Дарханын уонна Бырабыыталыстыбатын пресс-сулууспата иһитиннэрэр.
Бу кииннэр “Доруобуйа харыстабыла” национальнай бырайыак “Искэн ыарыыларын бохсуу” эрэгийиэн бырагырааматынан аһыллыбыттара уонна ыарыыны кэлимсэ уонна түргэнник буларга анал тэриллээхтэр.
Саха сирин Доруобуйа харыстабылын министиэристибэтин чахчыларынан, 2022 сылга маннык кииннэргэ 45278 Саха сирин олохтооҕо сылдьыбыт. Оттон 2023 сыллаахха 606 киһи ыалдьыбыта биллибитэ. 2023 сыллааха олорор сирдэринэн химия терапиятын ылбыт пациент ахсаана 2021 сылы кытары тэисылдьыбыт.
“Биһиги улууспутугар, онколог-бырааспыт Андрей Егорович Захаров Дьокуускай куоракка үлэлии барбытынан сибээстээн балай эмэ өр кэмҥэ бырааһа суох олорбуппут онтон былырыын күһүн, чуолаан балаҕан ыйыгар куораттан Аян Анатольевич Артаа кэлэн үлэлии сылдьар. Билиҥҥи туругунан искэн ыарыылаахтар учуоттарыгар 200-кэ киһи бэлиэтэнэр, кинилэр истэриттэн 100-тэн тахса киһи искэнэ хомойуох иһин злокачественнай буолан тустаар эмтэниини ааһаллар. Бу ыарыы содулуттан 2022 сыллаахха – 20, 2023 сыллаахха – 21 уонна 2024 сылга – 27 киһи сырдык тыыннара быһынна. Бу инниттэн биһиги балыыһабыт үлэһиттэрэ хас сылын аайы диспансеризацияны ыыталлар, онкомаркеттары оҥороллор. Ханнык баҕарар ыарыыны саҕаланыан инниттэн эмтэнэргэ дьулуһуохтаахпыт ону үгүс олохтоохторбут ситэ өйдөөөбөккө, эрдэттэн көрдөрүнэн эмтэммэккэ, ыарыы бүтүннүү сиэбитин эрэ кэнниттэн кэлээхтииллэр. Биһиги балыыһабыт аныгы оборудованиенан балай эмэ хааччылынна, сыаналаах эмтэринэн күнүскү стационарга эмтииргэ кыһанабыт”, — диэн Прокопий Сокольников аатынан Чурапчытааҕы киин балыыһа кылаабынай бырааһа Николай Сивцев кэпсээтэ.
Доруобуйа харыстабылын министиэристибэтэ этэринэн, онкокөмө амбулатонй кииннэрэ түөрт сүрүн соругу толороллор.
Бастакытынан, бу кииннэргэ искэнинэн ыалдьыыны муҥутуур түргэнник булаллар.
Иккиһинэн, кииннэргэ онко-ыарыһахтар эмтэнэллэр, ол иһигэр күнүскү стационарга. Маны сэргэ кинилэр уопсай туруктарын хонтуруоллууллар, эмтэнии кэмигэр уонна кэнниттэн.
Үсүһүнэн, онкологиялаах уонна ыалдьар туруктаах пациеннары диспансернай кэтээн көрүү ыытыллар, паллиативнай эмтэниигэ уонна доруобуйаны чөлүгэр түһэриигэ ыыталлар, маннык ыарыһахтары учуокка ылаллар.
Төрдүһүнэн, ЦАОП-тарга мэдиссиинэ үлэһиттэригэр методическай үлэ ыытыллар, бу ыарыыны эрдэ булалларыгар үөрэтэллэр, ыарыы буулаабыта ырааппыт түгэннэрин ырыталлар.
Өрөспүүбүлүкэҕэ амбулаторнай онкологическай көмө кииннэрин кэҥэтиигэ үлэ салҕанар.
Сэмэн ЖЕНДРИНСКЭЙ