Олунньу ый саҕаланыыта Чурапчытааҕы физическэй култуура уонна спорт судаарыстыбаннай институтугар нуучча улуу бэйиэтэ Александр Сергеевич Пушкин төрөөбүтэ 225 сылын көрсө Социальнай – гуманитарнай дисциплиналар кафедраларын быһаччы тэрийиилэринэн дэкээдэтэ ыытылынна.
Дэкээдэҕэ улуу Александр Сергеевич хоһооннорун, поэмаларыттан нууччалыы, сахалыы өйтөн ааҕыылар, дорҕоонноохтук уус — уран ааҕыыларга конкурстар, педагогическай чинчийиилэргэ аһаҕас уруоктар, классик — суруйааччы олоҕор, айар үлэтигэр анаммыт эсселэр, дакылааттар конкурстара бэрт тэрээһиннээхтик бардылар. Манна барытыгар институт студеннара бука бары көхтөөхтүк кытыннылар. Тэрээһиннэри учуонайдар Любовь Адамова, Галина Алексеева, Елена Артеменко, Егор Винокуров, Светлана Гуляева, Петр Гуляев, Анна Данилова, Вячеслав Логинов, Евгений Коркин, Эдуард Федоров, преподавателлэр Туяра Захарова, Мария Оконешникова, Виктория Копылова, Василий Алексеев, Наталья Коркина, Анна Монастырева, Парасковья Явловская, библиотекарь Октябрина Окорокова баһылаан – көһүлээн, сүбэлээн- амалаан ыыттылар.
Ордук кэрэхсэбиллээх түгэнинэн дэкээдэҕэ «Архитектор жизненных стратегий: мы — студенты ЧГИФКиС» диэн физкултуура уонна спорт институтун инники сайдыытын торумнуур бөлүһүөктүү санаалар атастаһыылара буолла. Манна институт урукку выпускниктара, билигин өрөспүүбүлүкэ эппиэттээх үлэһиттэрэ Диана Васильева, Айтал Керемясов, Дайаана Васильева бэйэлэринэн кыттыбыттарын, бары үөрэ, долгуйа көрүстүбүт. Бөлүһүөктүүр оонньууга студеннар аҕыс хамаандалара санааларын эттилэр, бырайыак көмүскээтилэр, күрэс былдьаһан илин- кэлин түһүстүлэр.
Ити курдук, улуу нуучча бэйиэтигэр А.С.Пушкиҥҥа анаммыт дэкээдэтэ институт студеннарыгар махталы, тапталы бэлэхтээтэ.
П.Е.Явловская, А.А.Монастырева хаартыскаҕа түһэриилэрэ.