Мындаҕаайыга саҥа оскуола арыллыытын кэннэ Ил Дархан Айсен Николаев өрөспүүбүлүкэ бастыҥ оскуолаларыттан биирдэригэр — С.К.Макаров аатынан Чурапчы улуустааҕы гимназиятыгар сырытта.
Бэлиэтээн эттэххэ, быйыл биһиги улуус хамаандата «Инникигэ хардыы» XXVIII-с өрөспүүбүлүкэтээҕи научнай-практическай кэмпириэнсийэҕэ иккис сылын бастаата. Гимназия уораҕайыгар Айсен Сергеевич манна ситиһиилээхтик кыттыбыт оҕолору көрүстэ, үлэлэрин билистэ.
Үөрэнээччилэр Ил Дархаҥҥа ИТ-технологиялар, ирбэт тоҥ, мэдиссиинэ эйгэлэригэр, битэмииннээх чэй оҥоруутугар көмүскээбит бырайыактарын кэпсээтилэр. Кинилэр бу бырайыактарын чэрчитинэн үгүс үлэ, чинчийии ыыппыттарын Айсен Сергеевич сэргээтэ, оҕолору хайҕаата.
Маны сэргэ өрөспүүбүлүкэҕэ инники күөҥҥэ сылдьар Чурапчы үөрэнээччилэрин байыаннай-патриотическай кулуубун кыттыылаахтара Ил Дархаҥҥа, кэлбит ыалдьыттарга бэйэлэрин сатабылларын көрдөрдүлэр.
СӨ Ил Дархана Айсен Николаев бу оҕолортон Сахабыт сирин, дойдубутун сайдыылаах, кэскиллээх инникигэ сирдиир чулуу дьоннор тахсалларыгар бигэ эрэллээҕин эттэ.
Наталья Сибирякова