Ил Дархан Айсен Николаев бэйэтин этиитигэр өрөспүүбүлүкэбит социальнай-экономическай сайдыытын, доруобуйа харыстабылын, үөрэҕириини, бырамыысыланнаһы, урбааны, тутууну, суол оҥоруутун о.д.а. эйгэлэри таһынан дьиэ кэргэҥҥэ, чуолаан элбэх оҕолоохторго, өйөбүл туһунан сырдатта. Дойдубут бэрэсидьиэнэ Владимир Путин кэлэр 2024 сылы Дьиэ кэргэн сылынан биллэрэрин номнуо этэн турар. Онно даҕатан бүгүн Ил Дархаммыт кэлэр сыл өрөспүүбүлүкэбитигэр Оҕо саас сыла буоларын тоһоҕолообута олус улахан суолталаах.
Сахабыт сиригэр 34 тыһыынча кэриҥэ элбэх оҕолоох ыал баар. Кинилэргэ федеральнай таһымнаах араас көмөнү таһынан өрөспүүбүлүкэ иһинэн көрүллэр «Дети столетия» диэн итиэннэ ийэ капиталлара төһүү күүс, өйөбүл буолаллара саарбаҕа суох.
Элбэх оҕолоох эдэр ийэ Нарьяна Бурцева: «Ил Дархаммыт Айсен Николаев этиитин олус диэн сэргии иһиттим. Биһиги ыал үс оҕолоох буоларбыт быһыытынан чуолаан дьиэ кэргэҥҥэ сыһыаннаах өйөбүл туһунан интэриэһиргээтим. Чурапчыга үүнэр 2024 сыл саҥатыгар Дьиэ кэргэҥҥэ аналлаах элбэх өҥөнү оҥорор киин аһылларын туһунан Айсен Сергеевич бэлиэтээтэ. Бу кииҥҥэ хас биирдии оҕолоох дьиэ кэргэн кэлэн, бэйэтин долгутар боппуруостарын, кыһалҕаларын быһаартарар кыахтанар. Улууспут өрүү маннык инники күөҥҥэ сылдьарыттан киэн туттабын»,-диэн санаатын үллэстэр.
Чахчы даҕаны, үүнэр сылбыт Дьиэ кэргэҥҥэ, оҕолорбутугар ананан, хас биирдии ыалга улахан болҕомто ууруллуо, үгүс саҥа хамсааһыннар тахсыахтара, саҥа сүүрээннэр киириэхтэрэ диэн эрэнэбит.
Наталья Сибирякова