Бүгүн, тохсунньу 20 күнүгэр, улуус баһылыгын социальнай боппуруостарга солбуйааччы Мария Кронникова салайааччылаах 2-с бөлөх улуус дьаһалтатын ааспыт сыллааҕы үлэтин отчуотун Хоптоҕо нэһилиэгэр иһитиннэрдэ. Мунньаҕы баһылык Алексей Бурцев салайан ыытта, уопсайа 120 киһи кыттыыны ылла.
Мария Филипповна сүрүн дакылааты оҥордо. Ол кэннэ норуот дьоруойа Гаврил Протодьяконов аатынан анал бэлиэни байыаннай дьайыы кыттыылааҕар Гаврил Пинигиҥҥэ анаан, кини ийэтигэр Альбина Пинигинаҕа туттарылынна, «Ыал саргыта» пилотнай бырагыраама чэрчитинэн 50 тыһ. солкуобайдаах сэртипикээттэри бастакы оҕолорун төрөппүт Анэля Аммосова, Алена Федорова, Дайаана Муксунова туттулар.
Салгыы Егор Корякин Бөтүгүттэттэн Хадаар нэһилиэгэр диэри суол өрөмүөнүн, үүт харчыта көрүллүүтүн, бэйэни салайыныы саҥа сокуонун туһунан туоһуласта. Манна улуус баһылыгын тутууга уонна архитектураҕа солбуйааччы Афанасий Дьячковскай бу суол учаастагын хапытаалынай өрөмүөнэ 2026-2028 сс. былааҥҥа киирбитин иһитиннэрдэ. Николай Аргунов ФГДС аппарата туһанылла илигин, эндоскопист быраас наадатын, нэһилиэккэ бэтэринээр тиийбэтин эттэ, уот счетчиктара үлэлээбэттэринэн, саҥа счетчиктары туруоруу боппуруоһун сураста.
Маны таһынан нэһилиэк олохтоохторо оскуола хапытаалынай өрөмүөнүн, уһуйаан тутуллуутун, тыа хаһаайыстыбатыгар кэпэрэтиип тэриллиитин, доруобуйа харыстабылыгар лаборант, стоматолог быраас көрүллүүтүн, заправка, оскуолаҕа автодром үлэтин сөргүтүү, «Бырыы» лааҕырга, Балаҕаннаах учаастакка уот тардыллыытын ыйыталастылар, нэһилиэктэр уонна улуус киинин икки ардыгар автобус сырыытын туруорустулар.
Түмүккэ олохтоохтор улуус дьаһалтатын былырыыҥҥы үлэтин сөптөөҕүнэн сыаналаатылар.
Людмила Горохова.