Нэһилиэкпитигэр С. М. Ананьев аатынан Дириҥ учаастактааҕы балыыһатын устуоруйатын түмэн-бичийэн «Хоптоҕо нэһилиэгэр доруобуйа харыстабылын сайдыыта» диэн ааттаах кинигэ үөрүүлээх быһыыга-майгыга сүрэхтэннэ.
Бу кинигэҕэ Хоптоҕо нэһилиэгэр доруобуйа харыстабылын устуоруйатын, билиҥҥи кэмҥэ үлэтин-хамнаһын туһунан архыып докумуоннара, бэчээккэ тахсыбыт ыстатыйалар, үлэлээн ааспыт кырдьаҕас көлүөнэ уонна билигин үлэлии сылдьар дьон ахтыылара киирдилэр.
Кинигэҕэ үлэлэспит дьонунан матырыйаалы хомуйан киллэрээччилэр Дириҥнээҕи врачебнай амбулатория сэбиэдиссэйэ О. П. Иванова, дьуһуурунай сиэстэрэ Л. Г. Кирсанова, 23 №-дээх аптечнай пуун сэбиэдиссэйэ В. Г. Божедонов, алын медперсонал А. П. Тарасова буолаллар, бэчээккэ СӨ култуура туйгуна, кыраайы үөрэтээччи К. М. Тарабукина бэлэмнээтэ .
Тэрээһиҥҥэ «Хоптоҕо нэһилиэгэ» МТ дьаһалтатын баһылыга А. Л. Бурцев, Чурапчы улууһун киин балыыһатын методист бырааһа , СӨ үтүөлээх бырааһа А. И. Коркин, Дириҥ учаастактааҕы балыыһатын араас кэмнэргэ үлэлээбит медицина бэтэрээннэрэ, билиҥҥи кэлэктиип үлэһиттэрэ, нэһилиэк олохтоохторо улахан махталларын уонна эҕэрдэлэрин долгуйан туран эттилэр.
Тэрээһини олохтоох бибилэтиэкэ сэбиэдиссэйэ М. П. Толстоухова иилээн-саҕалаан ыытта.
Кинигэ, бастатан туран, үүнэр көлүөнэ нэһилиэктэрин устуоруйатын билэ, ытыгылыы улаатарыгар, киэн туттар санааны саҕыыга, сүгүрүйэр өйдөбүлү иҥэриигэ туһуланар.
М. Толстоухова