Муус устар 6 күнүгэр, СӨ үтүөлээх учуутала, Арассыыйа уопсай үөрэхтээһинин Бочуоттаах үлэһитэ, биллиилээх методист учуутал, СӨ үөрэҕириигэ министиэристибэтин “Учууталлар учууталлара” бэлиэ хаһаайына, өрөспүүбүлүкэ бэтэрээн учууталларын чилиэнэ, Чурапчы улууһун уонна Хоптоҕо нэһилиэгин Бочуоттаах олохтооҕо Тамара Семеновна Евграфова-Хоҥкуйа Хотун “Сырдык санааларым” диэн алгыстарын кинигэтин сүрэхтэниитиэ буолла.
Суруйааччылар, чугас дьонноро, Мэлдьэхси түмсүүттэн, Чурапчы айар түмсүүттэн, сарсыардааҥҥы алгыстарын сэҥээрэр дьон элбэх киһи мустубут. Кинилэр ортолоруттан одук Светлана Георгиевна (Габышева) Егорова — Тулуйхаана олус истиҥ толору ырытыы оҥордо.
Элбэх киһи махтанна, иһирэх тыл эттилэр. Оскуола үөрэнээччилэрэ, кэллиэс, университет устудьуоннара алгыстарын ааҕан иһитиннэрдилэр. Тэрээһини чугас дьүөгэтэ, профессор Парасковья Алексеевна Гоголева иилээн-салайан ыытта. Чугас дьонноро махтал суруктары, кыра өйдөбүнньүк бэлэхтэри туттардыбыт.
Бу алгыстары Тамара Семеновна 2021 сылтан саҕалаан хас сарсыарда аайы суруйан бассаап ситимин нөҥүө ыытар эбит. “Бииртэн биир ураты, дириҥ ис хоһоонноох алгыстар. Булан, сэҥээрэн ааҕаргытыгар”, — диэн тириэрдэллэр биир дойдулаахтара.
Санатан эттэххэ, бу иннинэ, Тамара Семеновна “Ааспыты эргиттэххэ” диэн өссө биир дьоһуннаах кинигэни бэчээттэппитэ.
Светлана Егорова-Тулуйхаана эппитинии: “Кини кэпсээннэрин киһи ааҕа олорон, ордук Мэлдьэхситтэн төрүттээх буоллаххына, бэркэ билэр дьоҥҥун Үгүрүө Баһылайы, Аркадий Семенович Родионовы, Егор Иннокентьевич Габышевы кытта алтыһан ылаҕын. Этэргэ дылы, “ааспыт ааспат амтана” буолан аҕа көлүөнэ дьону олус долгутан ылар. Хоҥкуйа Хотун кэпсээннэрэ иитэр-үөрэтэр хайысхалаахтар. Дьон-сэргэ үтүө майгытын, кыайыылаах үлэтин, оҕоҕо харыстабыллаах сыһыанын, тулалыыр эйгэҕэ тапталын кини айымньыларыгар булаҕын. Айар кут абылаҥа туспа бэйэтэ суоллаах-иистээх, хантан эрэ саҕаламмыт ыллыктаах буоллаҕа. Оттон Тамара Семеновна айар талаана биһигин ыйаабыт, түптэ, алаадьы сыттаах Хоҥкуйа алаастан силис тартаҕа. Хоҥкуйа Хотун диэн дьоһуннаах суруйааччыны айар-тутар эйгэҕэ сиэтэн киллэрдэҕэ”.
Сэмэн Жендринскэй