Хатылытааҕы «Ньургуһун» уһуйаан Улуу Кыайыыга анаабыт биир былаанын ситистэ

Улуу Кыайыы үбүлүөйдээх сылыгар анаан, «Кыайыы 80 сылыгар — 80 күүрээн күннэр» диэн ылыммыт былааммыт чэрчитинэн, Хатылытааҕы  «Ньургуһун» уһуйаан кэлэктиибэ  биэс бойобуой уордьаннаах Семён Дмитриевич Флегонтов аатынан Хадаар орто оскуолатын тэрийэр үлэтин-хамнаһын билсэн, оскуола иһинэн тэриллибит герой-пионер Сима Сергеев аатынан музейы көрөн-истэн кэллибит.
Дириэктэри иитэр үлэҕэ солбуйааччы Л. И. Лукина пионер оҕолорун кытта оскуола устун экскурсия тэрийдилэр. Пионерскай дружина диэн Чурапчы улууһугар Хадаар орто оскуолатыгар эрэ баарын биллибит. Музей салайааччыта Елена Семеновна Сима кылгас олоҕун туһунан сырдатта. Маны таһынан музей биир салаатын — саха норуотун олоҕун-дьаһаҕын сэһэргиир былыргы экспонаттары көрдүбүт, оччотооҕу историяны билистибит. Хадаар пионердара чиэс биэрэн туран, «Герой буолан төрөөбөттөр, герой буолан улааталлар» хоһоону дорҕоонноохтук ааҕыылара, итиэннэ «Сима — герой-пионер» ырыаны хорунан толоруулара истиэххэ олус долгутуулаах буолла.

Түмүгэр, «Төгүрүк остуолга» оччотооҕу пионерия, комсомол туһунан, билиҥҥи оҕо хамсааһынын тэрилтэлэрин уонна уопсай иитии боппуруостарыгар сэһэргэстибит, санаабытын атастастыбыт. Хадаар орто оскуолатын кэлэктиибигэр, музей үлэһиттэригэр Сима Сергеев аатын үйэтитиигэ туһулуур, кэлэр көлүөнэ ыччаты патриоттуу тыыҥҥа иитэр үлэлэригэр саҥа сүүрээннэри, чаҕылхай ситиһиилэри, кыайыылары баҕарабыт!

Мария  Кириллина.