Өрөспүүбүлүкэ экономикаҕа миниистирин солбуйааччы Мария Аргунова салайар Бырабыыталыстыба отчуоттуур бөлөҕө бүгүн киэһэ үһүс нэһилиэгэр Хатылыга үлэлээтэ. Кини отчуоту саҕалыан иннинэ, нэһилиэк элбэх оҕолоох эдэр ыалыгар Валерия Николай Кривошапкиннарга саҥа дьиэни тутталларыгар анаан, улуус баһылыга Степан Саргыдаев илии батааһыннаах сэртипикээти үөрүүлээх быһыыга туттарда.
Мунньаҕы улуус баһылыга Степан Саргыдаев сүрүннээтэ. Отчуоту 62 киһи иһиттэ. Олохтоохтор үгүс нэһилиэктэр туруорар кыһалҕаларын — тыа сиригэр ыччаты олохсутуу, нэһилиэнньэ ахсаанын элбэтии, тыа хаһаайыстыбатын салгыы сайдар дьылҕатын тобулуу, каадырынан хааччыллыы, ыччаты анал идэлэргэ үөрэтии тула үгүс ыйытыылары биэрдилэр. Тыа хаһаайыстыбатынан дьарыктанар эдэр дьоҥҥо, элбэх оҕолоох ыалга көмө көрүллүүтүн, ханнык анал бырагыраамалар үлэлииллэрин туоһуластылар. Ынах сүөһүгэ бэриллэр субсидия балаһыанньатын, үлэ бэтэрээнэ буоларга ирдэбиллэр туһунан ыйытыы киирэн эппиэттэннэ.
Итини тэҥэ гаас ситимигэр холбонууга бырайыакка киирбэккэ хаалбыт уһаайбаларга кэлэр өттүгэр гаас ситимэ холбонорун, суоҕун сурастылар.
Хатылылар биир сүрүн кыһалҕалара — саҥа кулууп дьиэтин тутуллуута. Өр кэмнэргэ баһылыгынан үлэлээбит Ульяна Атласова 2017 сыллаахха хаарбах туруктааҕынан билиниллибит сынньалаҥ киинин оннугар саҥа эбийиэги туттарыы боппуруоһа сылын ахсын турар эрээри, тоҕо эрэ хамсааһын тахса илигин эттэ. Онон бырайыагын корректировкалаан, уочаратын чугаһатан, быйылгыттан үлэни-хамнаһы саҕалыырга туруоруста итиэннэ Бырабыыталыстыба бэрэссэдээтэлин бастакы солбуйааччытыгар Дьулустан Борисовка көрдөһүү суругун тиэрдэллэригэр анаан туттарда.
Оскуола дириэктэрэ Екатерина Егорова бу нэһилиэк улуус кииниттэн чугас сытарынан, дьон-сэргэ, ыччат олохсуйарыгар табыгастааҕын, үөрэх эйгэтин сайыннарыы тоҕоостооҕун бэлиэтээн туран, аныгы таһымнаах инновационнай үөрэнэр киин тутуллуутун туруоруста. Уһуйаан сэбиэдиссэйэ Татьяна Ефремова үлэлээбитин тухары 4 төгүллээн үлэ миэстэтин сарбыйыы тахсыбытын, былырыыҥҥыттан хонуктаах бөлөҕү саппыттарын, 4 эрэ үлэһит толору штакка үлэлиирин этэн туран, нормативнай үбүлээһини Бырабыыталыстыба таһымыгар дьүүллэһэллэригэр туруоруста. Хатылы нэһилиэгин олохтоохторо Бырабыыталыстыба ааспыт сыллааҕы үлэтин сөптөөҕүнэн сыаналаатылар, туруорсубут боппуруостары толороллоругар эрэнэллэрин биллэрдилэр.
Анна Захарова.