Бүгүн улуус баһылыгын отчуота Хатылыга буолла. Отчуоту 100 киһи иһиттэ.
Олохтоохтор сүрүннээн саҥа оскуола, музей, балыыһа дьиэлэрин тутуу хаһан саҕаланыахтааҕын сэргииллэр. Онуоха быйыл кыаллыбатын, салгыы кэлэр сылларга сыыйа үлэ-хамнас
ыытыллыахтааҕын эттилэр. Итини тэҥэ улуус кииниттэн Хатылыга диэри аспаал суол хаһан оҥоһулларын, гааска холбонууга докумуоннары ситэрии, инбэлииттэргэ дьиэ өрөмүөнүгэр көмө көрүллүүтүн, тыа сиригэр үлэнэн хааччыллыы, бэйдиэ сылдьар ыттарга миэрэлэри ылыы, социальнай контрагынан туһаныы, үүтү, эти туттарыы сыанатын, тыа хаһаайыстыбатыгар көрүллэр туһааннаах өйөбүллэр, көмөлөр о.д.а. үлэ бары хайысхатыгар ыйытыылар киирэн эппиэттэннилэр.
Таатта үрэх сүнньүгэр сытар нэһилиэк олохтоохторун сааскы халаан уутун этэҥҥэ аһарыы, бөһүөлэк иһинээҕи эбэни уунан толоруу боппуруоһа ордук долгутар. Онон «Харбала 1» ууну аһарар шлюз-регуляторы саҥалыы тутуу, Лахалдьы быһытын оҥоруу боппуруостарын көтөхтүлэр.
Итини тэҥэ «Лахалдьы» түөлбэ олохтоохторун аатыттан Анна Скрябина бу түөлбэ дьиэлэрин гаас ситимигэр холботууга бырайыагы көрөллөрүгэр, барыта 17 киһи илии баттаабыт көрдөһүү суругу улуус баһылыгар Степан Саргыдаевка туттарда.
Тыа хаһаайыстыбатын хайысхатыгар сири нүөлсүтүү, ходуһаны күрүөлээһиҥҥэ субсидия көрүллүүтүн, бааһыналары сөргүтүү о.д.а. ыйытыылар киирбиттэрин улуус баһылыга биһирээн бэлиэтээтэ уонна «Сир ийэ» бырайыак салгыы үлэлиирин, онуоха Хатылы дьоно-сэргэтэ маҥнайгы саҕалааһыны күүскэ өйөөбүттэрин, үгүс өрүттээх үлэни-хамнаһы тэрийбиттэрин эттэ, махтанна. Барыта 32 ыйытыы киирдэ.
Олохтоохтор улуус дьаһалтатын ааспыт сыллааҕы үлэтин сөптөөҕүнэн сыаналаатылар.
Анна Захарова