Чурапчыга социальнай бырагырааманан гаас ситимин тардыы салҕанар. Хатылы нэһилиэгэр бу бырагырааманан ааспыт күһүн 34 дьиэ холбоммута. Нэһилиэк баһылыга Вячеслав Попов билиһиннэрбитинэн, быйыл сайын «Восток капитал» хааччахтаммыт эппиэтинэстээх тэрилтэ бөһүөлэк иһигэр гаас ситимин салгыы тардыыга үлэлиир. Нэһилиэк олохтоохторо «Аартут», «Технология тепла», «Строй-В», «Газтрейд» ХЭТ-лэр бэдэрээччиктэрин кытта дуогабар түһэрсэн үлэлэһэ сылдьаллар.
Быйылгы сылга 175 сайаапка киирбит, итинтэн 105 ыал бырайыагын оҥорторон олорор. Киинтэн ититии ситимиттэн арахсан, «Бырамыысыланнай потенциалы сайыннарыы агентствотын» нөҥүө 28 ыал субсидиянан туһаммыт, итини тэҥэ социальнай управление нөҥүө блокированнай счетунан субсидияҕа сайабылыанньа биэрэн, 29 ыал туһанна. Гаас ситимигэр холбонууга уопсайа 209 сайаапка киирбит.
Манна сыһыаран эттэххэ, гаас ситимин тардыы үлэтэ салгыы Чурапчы киинигэр, Хадаарга, Хоптоҕоҕо ыытыллар. Онуоха бу ситимҥэ холбонооччулар тымныы ыган кэлэрин кэтэспэккэ, аны күһүн тиийэн кэмсиммэт гына, эрдэттэн докумуоннарын барытын туттараллара, дьиэлэрин бэлэмнииллэрэ ирдэнэр.
Анна Захарова.