Эрдэ биллэриллибитин курдук 2024 уонна 2025 сыллар Арассыыйаҕа уонна Кытайга, икки модун дойдулар доҕордуу сыһыаннарын күүһүрдээри, төрүт үгэстэри, олоҕу-дьаһаҕы өссө үчүгэйдик билсэр сыалтан Култуура сылынан биллэрбиттэрэ.
Ити сыл чэрчитинэн 2025 дьыл саҕаланыыта Улуу Кытай норуодунай өрөспүүбүлүкэтигэр Култуура сылын чэрчитинэн норуоттар икки ардыларынааҕы куонкурус-бэстибээл буолан ааста.
Бу маннык улахан түһүлгэҕэ, Василий Соловьев-Болот Боотур аатынан Хатылы орто оскуолатын “Үөрүү” оҕо дьоҕурун эбии сайыннарар киин филиалын иһинэн үлэлиир “Сардаҥа” оҕо үҥкүү ансаамбыла Цицикар куоракка Гран при, ону таһынан 1-2-с истиэпэннээх лауреат үрдүк ааттарын ылары ситистилэр.
Хатылылар итинэн эрэ муҥурдамматылар, улахан дьон бөлөҕөр “Алгыс” үҥкүү ансаамбыла 1-2-с истиэпэннээх лауреаттарынан буоллулар.
Бэстибээл дьүүллүүр сүбэтигэр куорат мэра Чхэн Син Пин, култуура миниистирэ Лю Чхун Фэн итиэннэ оҕо дыбарыаһын дириэктэрэ Дин Жу Сюань бэйэлэринэн үлэлээтилэр.
Сэмэн ЖЕНДРИНСКЭЙ