Оскуолатааҕы сыллар – киһи үйэтин-сааһын тухары умнубат, сырдык өйдөбүлү саҕар кэрэ кэм. Киһи буолуу, саха буолуу барыта манна төрүттэнэр, төрөөбүт дойдуга, Ийэ Сиргэ, бар дьоҥҥо таптал манна саҕыллар, дьоһун дьон буолан кэрэ олоҕу олорор баҕа санаа манна иитиллэр.
Быйылгы үөрэх дьылыгар улууспут үрдүнэн 21 оскуолаҕа 5958 оҕо үөрэннэ. 9 кылааһы 316 , 11 кылааһы 225 үөрэнээччи түмүктээн ОГЭ, ЕГЭ туттарыаҕа. 25 выпускник мэтээлгэ үлэлиир. Оттон буойун-учуутал Василий Соловьев-Болот Боотур аатынан Хатылы орто оскуолатыгар быйылгы үөрэх дьылын 209 үөрэнээччи түмүктээтэ, 4 кылааһы – 18, 9 кылааһы – 13 уонна 11 кылааһы – 8 выпускник ситиһиилээхтик эксээмэннэрин саҕалаатылар. Дьон-сэргэ улаханнык ымсыырар Хатылы орто оскуолатыгар Анна, Дмитрий Чечебутовтар, Евдокия Соловьева, Николай Федоров, Мотрена Попова, Михаил Борисов, Николай Соловьев о.д.а. биллиилээх учууталлар үлэлээн-хамсаан аспыттара. Оскуола медалистарын Эдита Михайлова, Сайаана Иванова, Вика Титова, Ваня Драгунов, Маша Белолюбская, Туйаара Догдонова о.д.а. ааттарынан күн бүгүҥҥээҥи диэри киэн туттар.
Быйылгы 2024 сыл үөрэх дьылын 53 выпуһунан: үөрэх туйгуннара Аня Кривошапкина, Милена Холмогорова, Влада Гаврильева итиэннэ үөрэх бастыҥнара Данил Барашков, Аида Федорова, Максим Белолюбскай, Вадим Захаров уонна Мичил Иванов түмүктээн эрэллэр.
Үөрэх хаамыыта бары оскуолаларга Бэдэрээлинэй Судаарыстыбаннай үөрэх стандартарыгар сөп түбэһиннэрэн ыытыллар. Оскуолаларбыт таһаарыылаах үлэлэрин туоһутунан Хатылы орто оскуолата быйыл Саха сирин 100 бастыҥ үөрэҕин кыһаларын ортотугар доҕоонноохтук ааттанна.
Тэрээһин үөрүүлээх чааһыгар оскуола дириэктэрэ Екатерина Егорова: “Кырдьык даҕаны бүгүн олус долгутуулаах күн! Биһиги бүгүн күммүт сүрүн дьоруойдара 11 кылааһы түмүктүүр, үөрэххэ олус тардыһыылаах, уурбут-туппут, ананан кэлбит курдук 4 кыыс уонна 4 уол дьоммут олох киэҥ аартыгар үктэннилэр. Бука барыларын кытары тус бэйэм кэпсэтэн, барыларыгар баҕа санаабын тириэрдэн турабын онон оҕолорбутугар сарсыҥҥаттан саҕаланар биир кэлим эксээмэннэригэр ситиһиилэри баҕарабыт. Эһиги билиигин, кыаххыт баар! Онон дьэ учууталларгыт 11 сыл устата иҥэрбит билиилэрин бүтүннүү хомуйа тутаҥҥыт эксээмэннэргитин үрдүк баалларга туттарыаххыт диэн ис сүрэхпиттэн эрэнэбин! Оскуолабыт бүгүҥҥү ситиһиилэригэр быйылгы выпускниктарбыт киллэрсибит кылааттара улахан. Онон оҕолорбутунан киэн туттабыт, кэлэктииппинэн киэн туттабын! Инникитин даҕаны ситиһиилэргэ, үрдүккэ дабайыаххайыҥ!”
Киһи-аймах сайдыытыгар эркээйи охсон олук уурар, дьонунан сир үрдүгэр биир саамай бочуоттанар идэлээх учууталлар буолаллар. Выпускниктар бүтэһик уруоктарыгар, начаалынай кылааска үөрэппит бастакы учууталлара, СӨ үөрэҕириитин туйгуна, “Үлэҕэ килбиэнин иһин” бэлиэ хаһаайына, 42 сылын үлэлии-хамсыы сылдьар Елена Романовна Попова үөрэттэ, үөрэнээччилэригэр бастакы тэтэрээттэрин көрдөрөн улаханнык долгутта, урукку хаартыскалары көрдөрөн урукку кэмнэри сүрдээх истиҥник санаһан ыллылар. Маннык учууталлар биэрэр киэҥ билиилэринэн, кыһамньыларынан үгүс көлүөнэ-дьон үүнэн-сайдан тахсаллар.
Быйылгы 53 выпуск кылааһын салайааччыта, “Саха сирин эрэлэ” бэлиэ хаһаайына, устуоруйа учуутала Вероника Спиридонова: “Күндү оскуоланы бүтэрэр выпускниктарым! Инникигэ эрэллээх, үрдүк култууралаах дьон буолуҥ, ханна да сырыттаргыт үөрэммит, ииппит оскуолаҕытын, учууталларгытын умнумаҥ. Биир кэлим экзаменнаргытын ситиһиилээхтик туттаран, сөбүлүүр, табыллыам дии санаабыт үөрэххитигэр киирэргитигэр, талан ылбыт идэҕитигэр бэриниилээхтик үөрэнэн, үчүгэй үлэһит буолан тахсын, дойдугут Чурапчы аатын чугдаарыта дуоратыҥ. Эһиги иннигитигэр Аан Ийэ дойду арыллан турар, айыҥ-тутуҥ, тус бэйэҕит саҥа дьикти кэрэхсэбиллээх суолгутун тэлэн, куруук инниҥ диэки хардыылаан иһиҥ!”
Сэмэн Жендринскэй. Ааптар хаартыскаҕа түһэриитэ