«Айылгы» норуот айымньытын дьиэтигэр Болот Боотур аатынан Хатылы орто оскуолатын бастыҥ үөрэнээччилэригэр аналлаах «»Ситис» территория успеха» бэстибээл ыытылынна. Үтүө үгэскэ кубулуйбут бырааһынньыкка бастыҥ көрдөрүүлээх актыбыыс, үөрэххэ, наукаҕа, спортка, культураҕа үгүс ситиһиилээх оҕолор ыҥырыллан сырыттылар.
Быйылгы тэрээһин уратытынан виртуальнай ыытааччы кыттыспыта буолар. Кини саалы толору кэлбит кыттааччыларга оскуолабыт ситиһиитин билиһиннэрдэ. Ол курдук, 2024 сыл түмүгүнэн өрөспүүбүлүкэ оскуолаларын рейтиҥэр 100 бастыҥнар ахсааннарыгар иккис төгүлүн киирбиппит, оскуоланы 3 медалист бүтэрбит, 51 үөрэнээччи Арассыыйатааҕы олимпиадалар уонна 17 оҕо профессионаллар чемпионаттарын кыайыылаахтара буолбуттар. Ону таһынан оскуолабыт улуус оскуолаларын рейтиҥин кыайыылааҕынан тахсыбыт.
Үөрүүлээх түгэнинэн Хатылы нэһилиэгин баһылыга Вячеслав Попов, оскуола дириэктэрэ Екатерина Иванова эҕэрдэ тылы эттилэр. Салгыы туйгун уонна үчүгэй үөрэнээччилэри, ону сэргэ кинилэр төрөппүттэрин, оскуола учууталларын чиэстээтилэр.
Саамай күүтүүлээх түгэнинэн «Территория успеха «Ситис» номинация чулууларын наҕараадалааһын сиэрэ-туома ыытылынна. Бу анал ааттар кыайыылаахтарынан сыл түмүгүнэн араас таһымнаах олимпиадалар, ааҕыылар, спортивнай, культурнай күрэхтэһиилэр кыайыылаахтара, улуус, оскуола олоҕор араас тэрээһини көҕүлүүр бастыҥ үөрэнээччилэр буолаллар. Ол курдук, «Знание» анал аат 4-с кылаас үөрэнээччитигэр Амелия Романоваҕа уонна 6-с кылаас үөрэнээччитигэр Мичийэ Поповаҕа, «Дарование» анал аат 3-с кылаас үөрэнээччитигэр Сандаара Павлуцкаяҕа, 7-с кылаас үөрэнээччитигэр Кристина Максимоваҕа, «Созидание» анал аат 10-с кылаас үөрэнээччитигэр Максим Кривошапкиҥҥа, «Инициатива» анал аат 9-с кылаас үөрэнээччитигэр Мичийээнэ Поповаҕа, «Стремление» анал аат 4-с кылаас үөрэнээччитигэр Мичил Драгуновка, 9-с кылаас үөрэнээччитигэр Вадим Поповка туттардылар.
Бырааһынньыгы “Көмүөл” аҕалар ансаамбыллара уонна «Сыдьаай” оскуола оҕолорун ансаамбыла ылбаҕай ырыаларынан киэргэтэн биэрдилэр. Россия киин куораттарын үрдүк үөрэҕин кыһаларыгар үөрэнэ сылдьар выпускниктарбыт ролик нөҥүө учууталлары, үөрэнээччилэри эҕэрдэлээтилэр. Бу күн оҕолорго ыҥырыылаах ыалдьытытынан эдэр ыччат кутун туппут Кит Джа буолла. Кини аныгылыы тэтимнээх толоруутун көрөөччүлэр астына иһиттилэр. Ити кэнниттэн оҕолор учууталлар уонна оскуола администрацията бэлэмнээбит фуршетыгар минньигэстик аһаан, дуоһуйа сынньаннылар.
Екатерина Иванова, оскуола дириэктэрэ:
— Сылын ахсын оскуола үлэһиттэрэ төрөппүттэри кытта сүбэлэһэн, үрдүк ситиһиилээх оҕолорбутугар анаан «Ситис» бэстибээли тэрийэбит, үөрүүлээх тэрээһини бэлэхтиибит. Онон төрөппүттэргэ истиҥ махталбытын тиэрдэбит. Бүгүн аҕыс бастыҥ көрдөрүүлээх оҕолорбутугар номинациялары анаатыбыт, учууталларбытын чиэстээтибит. Инникитин да оҕолорбут араас таһымнаах конференцияларга, олимпиадаларга, күрэхтэһиилэргэ көхтөөхтүк кыттан, ситиһиилэринэн үөрдэ турдуннар.
Витя Чичигинаров, 11-с кылаас үөрэнээччитэ, Английскай тыл бүтүн Арассыыйатааҕы олимпиадатын улуустааҕы түһүмэҕин призера:
— Учууталларбар, төрөппүттэрбэр махтанабын. Кинилэр көмөлөрүнэн, өйөбүллэринэн маннык үгүс ситиһиилээхпин.
Бу үтүө тэрээһин биһиги бастыҥнарбытын саҥа саҕахтарга кынаттыаҕа. Кинилэргэ ситиһиилэри, доруобуйаны уонна дьолу баҕарабыт!
Дарина Слепцова, Соня Платонова,
Хатылы орто оскуолатын 7-с кылааһын үөрэнээччилэрэ,
«Медиакласс» куруһуога.