Алтынньы 2 күнүгэр Василий Соловьев-Болот Боотур аатынан Хатылы орто оскуолатыгар, Дойду үрдүнэн “Педагог уонна уһуйааччы” сылын чэрчитинэн, буолаары турар “Учуутал” күнүн көрсө “Үс көлүөнэ ситимэ” диэн истиҥ-иһирэх тэрээһин буолан ааста.
Бу тэрээһиҥҥэ үс көлүөнэ учууталлар биир ситим буоланнар оҕолорго интегрированнай уруоктары, кылаас чаастары ыыттылар.
Ол курдук, 2 “а” кылааска кылаас салайааччыта “Учууталлар учууталлара” бэлиэ хаһаайына Айталина Чичигинарова, эдэр, кэскиллээх учуутал Дария Попова, кинилэри сэргэ алын сүһүөх кылаас учуутала, РСФСР норуотун үөрэҕириитин туйгуна, методист Анна Чечебутова саха тылыгар уруок ыыттылар.6-с кылааска, эдэр учуутал Алгыстаана Фёдорова уонна кинини үөрэх киэҥ эйгэтигэр уһуйбут, “Саха-Азия оҕолоро” национальнай пуонда стипендиата, РСФСР норуотун үөрэҕириитин туйгуна Иван Билюкин уруһуй уруогун оонньуу быһыытынан тэрийэн ыыттылар.
7 “а” кылааска элбэҕи эрэннэрэр эдэр учуутал Николай Афанасьев уонна РФ үөрэхтээһинин Бочуоттаах улэһитэ, СӨ үөрэхтээһин ситимин Бочуоттаах бэтэрээнэ Владимир Фёдоров, 11 кылааска географ Иван Федосеев, уһуйааччы, СӨ үөрэҕириитин туйгуна Анастасия Софронова уонна өр кэмҥэ география учууталынан үлэлээбит учууталбыт Вячеслав Николаев буолан холбооннор интегрированнай уруок ыыттылар.
5-с кылаас оҕолоругар СӨ норуодунай учуутала, Көһөрүллүү мусуойун төрүттээччи Дмитрий Чечебутов кыттыылаах “Холобур буолар олох” диэн кылаас чааһа буолла.
Оскуолабытыгар бу саҥа тэрээһин үөрүүлээх линейканан түмүктэннэ.
Лиана Яковлева, Анита Кривошапкина – Василий Соловьев аатынан Хатылы орто оскуолатын 7 “б” кылааһын үөрэнээччилэрэ
Бэлэмнээтэ Сэмэн Жендринскэй