Чурапчы улууһугар СӨ Бырабыыталыстыбатын отчуотун иккис күнэ. Ол курдук, СӨ Тыатын хаһаайыстыбатын миниистирин солбуйааччы Николай Афанасьев салайааччылаах иккс бөлөх күн бастакы аҥарыгар Хайахсыт нэһилиэгэр отчуоттаата.
Былырыын, кулун тутар 1 күнүгэр отчуоту 50 киһи истибит эбит буоллаҕына, олунньу 13-с — Ийэ тыл күнүгэр, быйыл 52 киһи сырытта. Отчуот кыттыылаахтара бары сахалыы таҥнан-симэнэн, Хайахсыттан аатырбыт олоҥхоһут Иннокентий Тимофеев-Теплоухов «Куруубай хааннаах Кулун Куллуустуур» олоҥхотуттан, Игнатий Каженкин толоруутугар быһа тардыыны иһиттиллэр.
Былырыыҥҥы отчуокка Хайахсыттартан 17 боппуруос, 5 этии киирбит эбит буоллаҕына быйыл 12 боппуруоһу кытары 1 этии киирдэ. Ол онно нэһилиэк олохтоохторо хас даҕаны тыа хаһаайыстыбатыгар сыһыаннаах ыйытыктары, чуолаан бизону уонна түргэнник ситэр дьиэ кыыллары иитиигэ, кинилэр аһылыктарын хааччыйыыга, хотон тутуутугар көмөлөрү, үүт харчытын, сүөһү сүтүүтүн миэрэлэрин туһунан буолбута. Маны тэҥэ олохтоохтор дьоҕус авиация сайдыытын, үлэ миэстэтин таһаарыы, уматык сыанатын үрдээһинин, анал байыаннай дьайыыны, үөрэххэ биир кэлим эксээмэни, Болонскай систиэмэни тохтотуу туһунан туоһуласпыттара.
Ону таһынан доруобуйа харыстабылын эйгэтигэр элбэх боппуруоһа сытыытык туруорбут эбит буоллахтарына быйыл,
Василий Федоров иһэр ууга болҕомтону ууралларыгар ыйда итини таһынан улуус нэһилиэктэригэр дулҕалаах сири көннөрүүгэ итиэннэ быһыттары оҥорууга улахан кыамталаах погрузчик тиэхэньикэлэринэн хааччыйалларыгар сүбэлээтэ.
Былырыын нэһилиэккэ медик суоҕа улахан кыһалҕа буолара ахтыллыбыта. Сүрүн биричиинэтинэн олорор усулуобуйалара кыаллыбатын ыйбыттара. Ол иһин нэһилиэнньэ элбэх кыбартыыралаах, толору хааччыллыылаах дьиэни туттарары туруорсарын этиммитэ. Быйыл даҕаны бу боппуруос сытыытык туран бэбиэскэттэн түспэтэ.
Олохтоох оскуола учуутала Анна Яковлева, эдэр исписэлиистэр олороллоругар аналлаах дьиэ-уот суоҕа, суол-иис куһаҕанын сиһилии барытын быһааран биэрдэ.
Оскуола физкултуураҕа учуутала Анатолий Филиппов 2000 үтүө дьыала бырагыраамманан МФЦ тутуллуута хаһыс түһүмэххэ тиийбитин туоһуласта.
Этиилэргэ, Афанасий Илларионов аатынан Хайахсыт орто оскуолатын дириэктэрин үөрэтэр чааска солбуйааччы Арина Шишигина, “өрөспүүбүлүкэҕэ тыл бэлиитикэтин күүһүрдэргэ” диэн биир мунньаҕынан кыайан быһаарыллыбат боппуруоһу туруорда. Кини онно холобур быһыытынан, Саха араадьыйатын ыытааччылара биэриилэрин аайы саҕалыын “Күндү истээччилэрбит” диэн тылы, уу сахалыы “ытыктабыллаах” диэн тылынан солбуйан биэрэллэригэр эттэ.
Отчуот хаамыытын, СӨ Ил түмэнин дьокутаата, Олимпийскай чөмпүйүөн Павел Пинигин кыраҕатык кэтээн көрөн иһиттэ, бэйэтин этиитигэр, биир дойдулаахтара кинини дьокутаатынан талбыттарыгар дириҥник махтанна уонна Хайахсыт нэһилиэгэр бэйэтин уопсастыбаннай көмөлөһөөччүтүнэн Николай Оконешниковы анаабытын туһунан иһитиннэрдэ.
Нэһилиэнньэ кыһалҕалаах ыйытыыларыгар толору хоруйу истэн астыннылар, оробуочай бөлөххө махтаннылар.
Онтон салгыы отчуоттур бөлөх Афанасий Илларионов аатынан Хайахсыт орто оскуолатын иһинэн тэриллибит мусуой хоһун көрдүлэр.
Сэмэн Жендринскэй. Ааптар хаартыскаҕа түһэриилэрэ