Бүгүн о.э муус устар 18 күнүгэр, СӨ Оҕо саас уонна Дойдуга Дьиэ кэргэн сылларын иилэринэн ыытыллар “Саха сирин бастыҥ сүбэһитэ-2024” эрэгийиэннээҕи куонкурус финалистара ааттаннылар.
Икки сыл анараа өттүгэр, Саха өрөспүүбүлүкэтэ “РФ олохтоохторун патриотическай иитиигэ” бэдэрээлинэй бырайыагы олоххо киллэриигэ пилотнай эрэгийиэнинэн буолбута. Итинэн сиэттэрэн өрөспүүбүлүкэбит бары оскуолаларыгар, номнуо иккис сылларын, дириэктэри иитии уонна оҕо уопсастыбаннай хамсааһыныгар сүрүннүүр сүбэһиттэрэ диэннэр анананнар көхтөөхтүк үлэлии-хамсыы сылдьаллар. Бу кылгас кэм иһигэр “Оҕо саас навигатордара” диэн Бэдэрээлинэй бырайыак бэйэтин кыаҕын ылынан үлэтин тэтимнээхтик саҕалаата.
Итиннэ олоҕуран, “Иитии саҥа философията” диэн Оҕо бириэмийэтин киэҥ араҥаҕа таһаараары, бэйэлэрин идэлэригэр бастыҥнары бириэмийэлээри, биһиги өрөспүүбүлүкэбитигэр аан бастакытын “Саха сирин бастыҥ сүбэһитэ-2024” эрэгийиэннээҕи куонкурус тэрилиннэ. Бүгүн, куонкурус иккис түһүмэҕэ түмүктэннэ, манна 24 улуустан дириэктэри иитии чааһыгар сүбэһиттэр кыттыыны ыллылар. Кыттааччылар манна туһаайыллыбыт кыһалҕалары сөпкө быһаарарга, бэйэлэрин уопуттарыгар олоҕуран, олохтоох холобурдары аҕалан сааһыламмыт этиилэри киллэрдилэр. Кинилэр үлэлэрин “Росдетйцентр” ФГБУ “Оҕо саас навигатордара” эрэгийиэннээҕи ресурснай киин салайааччыта Нюргуяна Макарова бэрэссэдээтэллээх, алта киһи састааптаах дьүүллүүр сүбэ сыаналаата.
Экспертнай үлэ түмүгүнэн, финалга 1 уонна 2-с түһүмэххэ саамай элбэх баалы ылбыт 23 сүбэһит аастылар. Манна “Новые горизонты” диэн номинацияҕа, бэйэтин кэнниггэр Дьокуускай куорат гимназияларын итиэнн Мэҥэ Хаҥалас Майатын сүбэһиттэрин кэннигэр хаалларан, Афанасий Илларионов аатынан Хайахсыт орто оскуолатын дириэктэрин иитии чааһыгар сүбэһитэ Саргылана Леонтьева 1-кы миэстэни ылла.
Финалга тахсыбыттар салгыы, ахсынньы 4-5 күннэригэр ыытыллыахтаах үһүс түһүмэххэ о.э. “Иитии саҥа философията-2024” Бүтүн Арассыыйатааҕы бириэмийэҕэ кыттар чиэскэ тигистилэр. Финал түмүгүнэн саамай элбэх баалы ылбыт кыттааччы “СӨ бастыҥ сүбэһитэ-2024” куонкурус муҥутуур кыайыылааҕынан буолуоҕа.
Онон, биир дойдулаахпытыгар Саргылана Прокопьевнаҕа идэтигэр өссө үрдүк дабайыылары баҕарыаҕыҥ, айар-тутар дьоҕура эбиллэн истин, бэйэтигэр эрэлэ сүппэтин.
Сэмэн Жендринскэй