Хайахсыкка хаһыс да сылын доруобуйа харыстабылын эйгэтин боппуруоһа сытыытык турар

Чурапчы улууһугар улуус баһылыгын 2024 сыллааҕы үлэтин отчуота саҕаланна. Бүгүн улуус баһылыгын социальнай боппуруостарга солбуйааччы Мария Кронникова салайааччылаах иккис бөлөх Чакыр нэһилиэгин кэнниттэн Хайахсыкка үлэлээтэ.

Мария Филипповна улууска 2024 сылга ыытыллыбыт үлэни-хамнаһы 62 киһи иннигэр отчуоттаата. Дакылааты ситэрэн, күөх экраҥҥа 15 мүнүүтэлээх видеоролик көрдөрүлүннэ.

Салгыы улуус дьокутааттарын Сэбиэтин бэрэссэдээтэлэ Яков Оконешников уонна улуус баһылыгын социальнай боппуруостарга солбуйааччы Мария Кронникова Саҥа үүммүт сылынан эҕэрдэлээн туран, өр кэмҥэ үтүө суобастаах үлэтин иһин III истиэпэннээх «Оройуон иннигэр үтүөлэрин иһин» бэлиэни Хайахсыт нэһилиэгин Бочуоттаах олохтооҕо Валентина Поисееваҕа, өрөспүүбүлүкэтээҕи «Бары бииргэ — Кыайыыга» ыстаап координационнай сэбиэтин салайааччытын Махтал суругун «Айтик» нэһилиэк дьахталларын волонтерскай түмсүүтүгэр, салайааччы Ксения Петроваҕа туттардылар.

Мунньахха олохтоохтортон үгүс боппуруос суругунан киирдэ. Ол курдук, тыа хаһаайыстыбатын хайысхатыгар чааһынай дьоҥҥо үүт сыаната үрдүүрүн, эбиэс бурдук, сүөһүнү сиэмэлээһин, өрөспүүбүлүкэттэн көрүллэр үпкэ утары улуус үп угуутун, хотон тутуутугар көмө көрүллүүтүн, тиэхиньикэ ыларга бааҥҥа кыра бырыһыаннаах кирэдьиит биэриитин, «Дьиэ кэргэн пиэрмэтэ», «Агростартап» граннар балаһыанньаларын туһунан ыйыттылар.

Бу нэһилиэккэ саҥа уопсай дьиэ тутуута хаһыс да сылын тыын боппуруоһунан буолар. Онон дьаһал кыттыылаахтара фельдшер, быраас, учуутал курдук эдэр исписэлиистэр олорор усулуобуйалара хааччыллыбатыттан нэһилиэккэ үлэлии кэлбэттэрэ улахан кыһалҕаны үөскэтэрин эттилэр. Маны сэргэ киин балыыһа үлэтигэр сыһыаннаах кыһалҕалаах боппуруостарыгар толору эппиэттэри ыллылар. Уот бардаҕына суотабай сибээс үлэлээбэтин бэлиэтээн туран, ону быһаарарга туруорустулар.

Ону таһынан бэйэ дьыаланы тэриниигэ социальнай хантыраак, бэйдиэ сылдьар ыттары бэрээдэктээһин, такси сыанатын хонтуруолга ылыы, дьиэлэргэ толору хааччыллыыны киллэрии, үлэтэ суохтарга пособие кээмэйин, «Манчаары оонньууларыгар» бэлэмнэнии, улууска бэтэрээннэргэ волейбол күрэҕин тэрийии, нэһилиэк иһинээҕи суолу оҥоруу уо.д.а. туһунан туоһуластылар.

Мунньах түмүгүнэн Хайахсыт нэһилиэгин олохтоохторо улуус дьаһалтатын ааспыт сыллааҕы үлэтин сөптөөҕүнэн сыаналаатылар.

Марфа Петрова.