Бэҕэһээ о.э. олунньу 27 күнүгэр, биллэр Судаарыстыбаннай диэйэтэл Афанасий Илларионов аатынан Хайахсыт орто уһуйаан-оскуолатыгар, улууспутугар уопуттаах алын сүһүөх кылаас учууталлара мустаннар, үөрэх хаачыстыбатын үрдэтиигэ аналлаах маастар-кылаастары көрдөрдүлэр итиэннэ эдэр учууталларга бэйэлэрин баай уопуттарыттан үллэһиннилэр, үлэҕэ методическай ньымалары көрдөрөн сүбэлээн-амалаан биэрдилэр, саҥардыллыбыт ФГОС бырагырамматыгар уруогу ыытыы методикатын, иитэр-үөрэтэр сыаллаах дьарыктары ыыттылар.
“Бу тэрээһин сүрүн көҕүлээччитинэн биһиги оскуолабыт үрдүкү категориялаах учуутала, СӨ үөрэҕириитин туйгуна Прасковья Николаевна Потапова буолар. Кини идиэйэтин өйөөннөр, бииргэ үлэлиир кэлиэгэлэрэ Иван Федосеев аатынан Дириҥнээҕи агро орто оскуолаттан, РФ үөрэҕириитин Бочуоттаах үлэһитэ Александра Платонова, үрдүк категориялаах учуутал Екатерина Иванова, Семен Флегонтов аатынан Хадаар орто оскуолатыттан, СӨ үөрэҕириитин туйгуна Сата Ноева, 2021 сыллаахха улуустааҕы эдэр педагогтар куонкурустарын лауреата Айталина Федорова, Хайахсыт орто оскуолатыттан үрдүкү категориялаах учуутал Ньургуйаана Бандерова кыттыыны ыллылар.
Маастар-кылаастарга Чурапчы улууһуттан 20 эдэр учууталлар кытыннылар, манна чуолаан “Кистэлэҥ холбукабын сэгэтэрн” диэн тиэмэ тула ыытылынна. Прасковья Николаевна “Оҕо таба суруйар сатабылын сайыннарыы” диэн үлэтинэн эдэр педагогтарга сүрдээх интэриэһинэй дьарыгы көрдөрдө. Ньургуйаана Сергеевна, төгүллээһин табылыыссатын үөрэтиигэ бэйэтин кистэлэҥнэрин арыйда. Кинилэри сэргэ Александра Ивановна уонна Екатерина Васильевна, төрөппүттэри кытары үлэҕэ уопуттарын үллэһиннилэр. Сата Ивановна алын сүһүөх учууталын сүрүн “Лайфхактарын” көрдөттөөтө. Айталина Александровна үөрэнээччилэр айар-тутар дьоҕурдарын сайдыытыгар сөптөөх кэбиниэт үлэтин тэрийии туһунан сырдатта. Арина Феодосьевна балансировочнай дуоскаҕа, оҕолор толкуйдуур дьоҕурдарын эбии сайыннарыыга ньымалы көрдөрдө. Инньэ гынан былааннаммыт маастар-кылаастарбыт олус сэргэхтик ааста.
Бүгүҥҥү тэрээһиммит кыттыылаахтара бары даҕаны олуһун үөрдүлэр, элбэх саҥаны биллибит дэһэллэр, инникитин даҕаны айымньылаах үлэлэригэр туһаналларыгар улаханнык эрэнэбит. Түгэнинэн туһанан, Хайахсыппыт оскуолатын салалтатын аатыттан улуустааҕы алын сүһүөх кылаастар сүрүн кураторбытыгар Луиза Максимоваҕа уонна улууспут үөрэҕин управлениетыгар сэминээрбитин ыытыга өйөбүллэрин иһин дириҥ махталбытын тириэрдэбит. Биллэн туран, кэлдэн кыттыыны ылбыт учууталларбытыгар махталбын эмиэ муҥура суох. Эдэр учууталлар инники үлэлэригэр, бэйэбит баай уопуппут хайа эмэ өттүттэн бэрсэн иҥэрдибит ини диэммин улаханнык эрэнэбит”, — диэн Афанасий Илларионов аатынан Хайахсыт орто оскуолатын дириэктэрин үөрэтэр үлэҕэ солбуйааччыта, былырыын ыытыллыбыт “Педагог-психолог” өрөспүүбүлүкэтээҕи проф.маастарыстыба куонкуруһун лауреата Арина Шишигина кэпсээтэ.
Сэмэн Жендринскэй