Бүгүн Арассыыйа оскуолаларыгар Билии күнүн бэлиэтиир тэрээһиннэр ыытылыннылар.
Саҥа үөрэх дьылыгар Афанасий Илларионов аатынан Хайахсыт орто оскуола-саадыгар барыта 84 оҕо үөрэнэ киирдэ. Олортон 4 кыыс, 4 уол оскуола боруогун аан маҥнай атыллаатылар. Кырачаан үөрэнээччилэргэ кылаас салайааччытынан Анна Кузьмина ананна.
Быйылгы үөрүүлээх линейка хайахсыттарга ураты буолла. Ол курдук, үөрэх-билии бырааһынньыгын саҥа таас оскуолаҕа аан бастакыларын бэлиэтээтилэр. Санатан эттэххэ, бу оскуола “Тыа сирин кэлимник сайыннарыы”бырагыраама көмөтүнэн тутуллан, ааспыт сыл бүтүүтэ үлэҕэ киирбитэ.
Үөрэх дьыла саҕаламмытынан үөрэнээччилэри, төрөппүттэри уонна педагогтары нэһилиэк баһылыга Тарас Тарасов эҕэрдэлээтэ. Кини үөрүүлээх быһыыга-майгыга «Нэһилэк сайдыытыгар кылаатын иһин” наҕарааданы «Чурапчы» ТХПК салайааччыта Алексей Егоровка туттарда.
Бу күн улуустааҕы үөрэх салалтатын медикопсихологическай отделын начаалынньыга Антонина Капрынова, Хайахсыт нэһилиэгин киэн туттар бэтэрээн учууталлара оҕолорго алгыс тылларын эттилэр, кылаас чаастарга сырыттылар.
Марфа ПЕТРОВА.