Аан дойду успуорду таптааччылара бүтүннүү Ислам Махачев уонна Ренато Мойкано киирсиилэрин кэтиир эбит буоллахтарына, Чурапчы улууһун успуорду сэҥээрээччилэрэ бүгүн, оҕолорго III-с төгүлүн ыытыллар “Хадаар түһүлгэтэ” мас тардыһыытын түмүгүн көһүтэллэр.
Маннык улахан түһүлгэ тэриллэрин истэннэр, Сахабыт сирин 10 оройуонуттан барыта холбоон 36 хамаанда тэриллэн кэллэ. Эдэр мадьынылары “Хадаар нэһилиэгэ” тыа сирин түөлбэтин баһылыга Афанасий Степанов, Чурапчы улууһун дьаһалтатын успуорка управлениетын начаалынньыга Дьулустаан Егоров, Семен Флегонтов аатынан Хадаар орто оскуолатын дириэктэрэ Петр Тарасов, улуустааҕы үөрэх управлениетын салалтатын сүрүннүүр исписэлииһ Матрена Филиппова эҕэрдэлээтилэр, кыайыы-хотууну баҕардылар.
Бэҕэһээ о.э тохсунньу 18 күнүгэр күрэхтэһии бастакы түһүмэҕэ түмүктэнэ оҕуста, уолаттар бэлэмнээхтэрин, ыалдьааччылар да хаалсыбаттарын барытын көрдөрдүлэр. Түһүлгэ сүрүн судьуйатынан Егор Капитонов, комментаторынан Илья Скрябин үлэлииллэр.
“Биллэн туран аан бастакытын кытта кэлбит эдэр ыспарсымыаннар долгуйуулара улахан, Хадаар нэһилиэгэ сабыс саҥа успуорт уораҕайын итиэннэ ыалдьыттар күрэхтэһэр, сынньанар усулуобуйаларын бүүс-бүтүннүүтүн бэлэмнээннэнэр күрэхтэһии олус үрдүк таһымҥа ыытылла турар. Биһиги Чурапчыбыт улууһун нэһилиэктэриттэн 44 эр бэрдэ помоска таҕыста, кинилэргэ эрэлбит улахан”, — диэн Дьулустаан Васильевич кэпсээтэ.
Бүгүн кыайыылаахтар ааттара дуорааннаахтык иһиллиэҕэ, “Саҥа олох” хаһыаты кытары бииргэ буолуҥ!
Сэмэн ЖЕНДРИНСКЭЙ