Биэс бойобуой уордьаннаах Семен Флегонтов аатынан Хадаар орто оскуолатын үөрэнээччилэрэ шефтээх улуустааҕы социальнай харалта тэрилтэни кытары “Илии сылааһа ис сүрэхтэн” үтүө үгэскэ кубулуйбут аахсыйаларын онус сылын тэрийэллэр.
Бүгүн социальнай харалта дьиэтин иһэ дьоллоох дьон күлүүтүнэн, саҥатынан туолла. Ол курдук орто оскуола иитэр үлэҕэ солбуйааччыта, кэргэннии Лидия Ивановна уонна физкултуура учуутала Александр Петрович Лукиннар дьааһык муҥунан үтүлүгү аҕаланнар социальнай харалта үлэһиттэригэр туттардылар.
“Биһиги тэрилтэбит Хадаар нэһилиэгин кытары уруккуттан шефтээхпит. Ол да иһин буолуо уон сыл устата, оскуола үөрэнээччилэрэ тиһиктэрин быспаккалар үтүлүк бэлэмнээн ыыталлар. Бу ананан кэлбит 60-ча үтүлүк доруобуйаларынан хааччахтаах дьоммутугар, соҕотох олорор эр дьоҥҥо бэриллиэхтэрэ. Кыра оҕолор үтүлүктэрэ, саастарын ситэ туола илик оҕолору реабилитациялыыр кииҥҥэ тиксэриэхпит. Онтон ордубуттары сороҕотун приемҥа кэлбит дьоммутугар илии сылааһыттан бэрсэн үөрдүөхпүт. Лидия Ивановнаҕа, чуолаан оскуола кэлэктиибигэр, аахсыйа кыттыбыт үөрэнээччилэргэ тэрилтэбит аатыттан улахан махталбытын тиэрдэбит”, — диэн социальнай харалта салайааччыта Лидия Васильевна Тосукаева ийэлии истиҥ алгыһын тиэрдэр.
Онон улахан тымныы түһүөн иннинэ “Илии сылааһа ис сүрэхтэн” аахсыйаны тэрийэн, аата да этэрин курдук, бэйэ-бэйэҕэ үтүө санааны саҕабыт.
Сэмэн ЖЕНДРИНСКЭЙ