Кулун тутар 28 күнүгэр Дьокуускайга харахтарынан мөлтөхтүк көрөр дьоҥҥо анаммыт голболга өрөспүүбүлүкэтээҕи чемпионат буолла. Онно Чурапчыттан уолаттар сүүмэрдэммит хамаандалара 2-с миэстэҕэ тиксэн, үрүҥ көмүс призер буоллулар. Бастакыны Дьокуускай, үсүһү Үөһээ Бүлүү хамаандалара ыллылар.
Хамаанда капитана, кэскиллээх спортсмен Алексей Посельскай «Бастыҥ оонньооччу» анал аат хаһаайынынан буолла. Улуустааҕы көрбөттөр уопсастыбаларын салайааччы Василий Пономарев эрдэттэн сатабыллаах тэрээһининэн уонна утумнаах эрчиллии, кыайыыга дьулуур түмүгүнэн бу улахан ситиһии кэллэ.
Биһиги улуустан бу паралимпийскай көрүҥҥэ эдэрдэр сыстан оонньоон эрэллэрэ кэрэхсэбиллээх. Маныаха былырыын Чурапчыга бастакынан ыыттыллыбыт «Илин эҥээр» кубога улахан суолталаах. Адаптивнай спорт чилиэннэрэ саҥа аһыллыбыт А.К. Софронов аатынан спорт саалаҕа маассабай спордунан дьарыктаналларыгар, күрэхтэһэллэригэр толору усулуобуйа тэрилиннэ, онон инникитин үрдүк көрдөрүүлэри ситиһэллэригэр төһүү буолара саарбахтаммат.
Иннокентий Матвеев.