Эрилик сопхуос саҕаттан төрүт үгэскэ кубулуйбут остуол тенниһигэр көһө сылдьар Кубок иһин күрэхтэһии, саҥа дьыллар өрөбүллэригэр чуолаан тохсунньу 6 күнүгэр Хайахсыт нэһилиэгэр буолла.
Уруккуттан даҕаны успуорка көхтөөх, баҕалаах нэһилиэктэр мустаннар – барыта холбоон 80 ыспарсымыан кэлэн кыттыыны ылла. Ыалдьытымсах майгылаах Хайахсыт нэһилиэгин дьоно-сэргэтэ, олохтоох дьаһалта кэлбит дьону үөрэ-көтө көрүстүлэр, арыылаах алаадьынан, минньигэс саламаатынан күндүлээтилэр.
Күрэхтэһии буоларын курдук бэрт тыҥааһыннаахтык ыытылынна, 2023-2024 сыллааҕы Кубок хаһаайыттара Одьулууннар кыайыы иһин туох баар сыраларын, албастарын ууран туран оонньоотулар.
Ол эрэн уопсай түмүккэ бэрт кыһыылаахтык 2020, 2021, 2022 сыллааҕы Кубок хаһаайыттарыгар, Хайахсыттарга, баһыйтараннар үрүҥ көмүс мэтээли ылары ситистилэр.
Боруонса мэтээл иһин Хоптоҕо уонна Хадаар нэһилиэктэрин сүүмэрдэммит хамаандаларын ыспарсымыаннара ыһыылаах-хаһыылаах оонньуу кэнниттэн, Дириҥнэр ордук бэлэмнээхтэрин көрдөрөн кыайыы-хотуу өрөгөйүн биллилэр.
Эр дьоҥҥо муҥутуур кыайыылааҕы быһаарар иһин оонньууга, Хайахсыттар физкултуураҕа учууталлара Ариан Кузьмин бастыҥ тиэхэньикэни көрдөрөн чөмпүйүөн үрдүк аатын ылары ситистэ.
Дьахталларга бастыҥы быһаараары саастарынан икки бөлөххө арааран оонньоттулар,
онно 18-тан 59 саастаах ыспарсымыаннарга кыайыылааҕынан Хайахсыт нэһилиэгиттэн Елена Борисова буолла онтон 60-тан үөһэ саастаахтар теннисчиттэргэ,
эмиэ Хайахсыт нэһилиэгиттэн, Надежда Филиппова чөмпүйүөннээтэ.
Сэмэн ЖЕНДРИНСКЭЙ