Афанасий Николаевич Дьячковскай Аҕа дойду көмүскэлигэр төрдүс төгүлүн бааһыран 1944 сыллаахха дойдутугар эргиллэн кэлиэҕиттэн үйэ чиэппэриттэн ордук кэм устатыгар биир да сыл тохтообокко эргиэн систиэмэтигэр үлэлээбитэ.
Кини бары күүһүн, кыһамньытын, дууһатын ууран үлэлээбит ити уһун кэмнээх үлэтэ үрдүктүк сыаналаммыта. 1962 сыллаахха Афанасий Николаевичка коммунистическай үлэ удаарынньыгын аата иҥэриллибитэ, “Холбос” бырабылыанньатын уонна эргиэн үлэһиттэрин идэлээх сойууһун обкомун уураахтарынан “Социалистическай кооперация туйгуна” значогунан наҕараадаламмыта. Саха АССР Үрдүкү Сэбиэтин 1965 сыл ыам ыйын 7 күнүнээҕи Ыйааҕынан киниэхэ “Саха АССР эргиэнин уонна уопсастыбаннай аһылыгын үтүөлээх үлэһитин” аата иҥэриллибитэ.
1968 сылга Афанасий Николаевич былааны таһынан 4600 солкуобай табаары атыылаабыта. Онон табаары атыылааһын ол иннинээҕи сылтан 10,5 бырыһыанынан үүнэрин ситиспитэ. Нэһилиэнньэ биирдии киһитигэр 462 солкуобай 10 харчылаах табаар тиксибитэ. Оттон 1969 сыл бастакы аҥарыгар былааны таһынан номнуо 4200 солкуобай табаар атыыланан, нэһилиэнньэ биирдии дууһатыгар 252 солкуобайдаах табаар тиксибитэ. Оройуон үрдүнэн кинигэ атыытын былаана туолбакка испит эбит буоллаҕына, Афанасий Николаевич 1968 сыллаахха 131,7, онтон 1969 сылга 6 ый иһигэр 122,5 бырыһыан толортообута.
Афанасий Николаевич кооперативнай баайы-дуолу бэйэтин киэнин курдук кичэйэн көрөрө-харайара, нэһилиэнььэ туохха наадыйарын үчүгэйдик үөрэтэрэ, ону толорор туһугар дьиҥнээхтик кыһанан үлэлиирэ. Кини тэрийиитинэн, көҕүлээһининэн кэлин Уһун Күөлгэ атыыһыта суох лааппылар, пионерскай-кооперативнай уопсастыба тэриллэн үлэлээбитэ. Маҕаһыын тиэйэ сылдьан атыылааһынын тиһигин быспакка ыытарын ситиспитэ. Оройуон ыытар дьаарбаҥкаларыгар тэрээһиннээхтик кыттара.
Сэмэн ЖЕНДРИНСКЭЙ