Бильярд-эрчимнээх илиилээхтэр, кыраҕы харахтаахтар, тобуллаҕас толкуйдаахтар оонньуулара. Спорт көрүҥүн быһыытынан аан дойдуга киэҥник биллэр. Сэтинньи 25-26 күннэригэр Дьокуускайга ,,Триумф» спорт дыбарыаһыгар спорт бу көрүҥэр бастыыр, кубок ылар иһин хамаанданан күрэх буолла. Турнир өрөспүүбүлүкэҕэ физкультурнай хамсааһын тэриллибитэ 100 сылыгар ананна.
Өрүс мууһа тура илигинэн, суол-иис мөлтөҕүнэн кыттааччы хамаанда аҕыйах буолла. Барыта 9 хамаанда кыттыыны ылла. Тааттаттан-1, Чурапчыттан-1, Мэҥэ Хаҥаластан-3, Үөһээ Бүлүүттэн-3
18-тан 40 саастарыгар диэри эр дьоҥҥо Чурапчы Чакырыттан Иван Еремеев, 40-тан 50 саастарыгар диэри Сылаҥтан Евгений Баишев кииристилэр.
50-тан үөһэ саастаах эр киһи уонна дьахтар күрэстэригэр пенсионер Прохор Макаров уонна физкультура учуутала Мария Игнатьева (сылаҥнар) улууспут чиэһин көмүскээтилэр.
Бастыҥ көрдөрүүлээхтэр финалга таҕыстылар. Тыҥааһыннаах киирсиигэ чурапчылар Таатта хамаандатын 61:26 хотон, кубок хаһаайыннарынан буоллулар, кыһыл көмүс мэтээллэринэн, грамотанан наҕараадаланнылар.
Күрэхтэһии кыттыылаахтара бильярды маассабай оҥорор, сытыырхатар сыалтан эһиилгиттэн сааскы ыйга эрдэттэн былааннаан, өрөспүүбүлүкэтэҕи турниры тэрийэргэ сүбэлэстилэр.
Алексей Слепцов