Анна Петровна оҕо сааһа тыа хаһаайыстыбатын холбоһуктааһын маҥнайгы сылларыгар ааспыта. Оччотооҕу тыа сирин муҥкук кыыһа колхуостары тэрийии айдааннаах мунньахтарын туһунан дьон кэпсэтиитин кыайан өйдөөбөт этэ, кумаар саҥатыныы истэрэ.
Онон кини төрөппүттэрэ хаһан, хайдах колхуоска киирбиттэрин билбэккэ да хаалбыта. Сыыйа олох тупсан, оскуолалар аһылланнар саҥардыы сэрбэйэ улаатан иһэр кыыс, улаханнык салла, дьулайа саныы-саныы, оскуола боруогун аан бастаан атыллаабыт күнүн хаһан да умнубатаҕа.
Күннэр-дьыллар хотоҕостуу субуллан ааһан испиттэрэ. Бииргэ үөрэнэр дьүөгэлэриниин араас кэрэ дьүһүннээх сибэккилэринэн симэммит күөх хонууга дьиэрэҥкэйдии тэбэрэ, үҥкүрүйэ оонньуура, лыаҕы эккирэтэн куйааска кытары буһара, ынах хомуйан, ньирэй тутан, туос ыаҕыйанан уу баһан “сээн” дэтэрэ. Кэлин дьороччу улаатан иһэн тыа сирин оҕолорун сиэринэн кыраабыл тутан оттоһор идэлэммитэ. Ити курдук үлэҕэ-хамнаска сыстыһан, ону-маны арааран, аттаран өйдүүр буолбута. Кинилэр итинник кыһынын үөрэнэн, сайынын үлэлээн, оонньоон-көрүлээн, оччотооҕу тыа сирин сэттэ кылаастаах оскуолатын бүтэрбит үөрүүлээх күннэрэ оҕо саас умнуллубат түгэнэ, сырдык санаа кыыма буолан өйдөрүгэр-санааларыгар иҥэн хаалбыта. Итинтэн дабыдал үүннэринэн, куорсун анньынан сорохтор үлэлии хаалбыттара, сорохтор салгыы үөрэнэ барбыттара.
Уус Алдан оройуонун Дүпсүн нэһилиэгиттэн эдэркээн кыыс аан бастаан Дьокуускай куоракка киирбитэ. Туймаада эбэ хотун кэмэ суох уулуссалара, киэн түннүктэрдээх баһаам элбэх дьиэлэрэ, массыыната үгүһэ, төттөрү-таары аалыҥнаһар дьоно, маҕаһыыннара, ларектара дэлэйэ тыа сириттэн киирбит кыыһы олус сөхтөрбүттэрэ. Бастаан Үп министиэристибэтигэр нолуок отделыгар сэкирэтээринэн үлэҕэ киирбитэ. Кини ити курдук үлэлии-үлэлии Дьокуускайдааҕы фельдшерскай-акушерскай училищеҕа кэтэхтэн үөрэммитэ уонна 1950 сыллаахха ону ситиһиилээхтик бүтэрбитэ.
Билиигэ-көрүүгэ баҕалаах Анна Петровна аны быраас идэтин баһылыыр алыбыгар ылларбыта. Ити баҕа санаатынан салайтаран, эдэр эрчиминэн дугуйданан Иркутскайдааҕы медицинскэй үнүстүүккэ киирбитэ. Аҕыйах сыл биллибэккэ ааспыта, гигиенист-быраас идэтин баһылаан төрөөбүт-үөскээбит Сахатын сиригэр кэлбитэ. Эдэр исписэлиис Дьокуускайдааҕы сэллик научнай-чинчийэр үнүстүүтүгэр үлэҕэ анаммыта. Кини үлэтин бастакы күннэриттэн талан ылбыт идэтигэр дьоҕурдааҕын, үлэҕэ баҕалааҕын көрдөрбүтэ, онон дьон-сэргэ ытыктабылын ылбыта. Ити кэнниттэн Уус Алдаҥҥа итиэннэ биһиги Чурапчыбыт оройуонугар сэллик балыыһатын кылаабынай бырааһынан үтүө суобастаахтык үлэлээбитэ. Кини ити уһун кэмҥэ сэллиги эмтээһиҥҥэ бэйэтин дьоҕурун, билиитин, сатабылын барытын биэрбитэ, кырата суох кылаатын киллэрсибитэ.
Анна Петровна Михайлова 1962 сыллаахха Саха АССР Үрдүкү Сэбиэтин дьокутаатынан талыллан быыбардааччылар үрдүк итэҕэллэрин чиэстээхтик толорбута. Кини өр сыллаах эҥкилэ суох үлэтэ “Килбиэннээх үлэтин иһин В.И. Ленин төрөөбүтэ 100 сыла туолуутун бэлиэтээн” үбүлүөйүнэй уонна “Үлэ бэтэрээнэ” мэтээллэринэн бэлиэтэммитэ. Итини сэргэ “Доруобуйа харыстабылын туйгуна” значогунан, үгүс ахсааннаах Бочуотунай грамоталарынан наҕараадаламмыта, киниэхэ Саха АССР үтүөлээх бырааһын аата иҥэриллибитэ. Ити хомуньуус эмчит сыралаах үлэтин үрдүктүк сыаналааһын чаҕылхай туоһутунан буолбута. Ханна да үлэлээтэр, балыыһалар уопсастыбаннай олохторуттан туора турбатаҕа, бэйэтин уопутугар эдэр исписэлиистэри уһуйбута.
1977 сыл сайыныгар өрөспүүбүлүкэ үтүөлээх бырааһын Анна Петровна Михайлованы үлэлээбит кэлэктиибэ бочуоттаах сынньалаҥҥа улахан алгыс тыллардаах атаарбыттара.
Сэмэн Жендринскэй