Кэбээйи Мастааҕыттан төрүттээх, хапсаҕайга СӨ успуордун маастара, көҥүл тустууга успуорт маастарыгар хандьыдаат, грэпплинг, бойобуой самбоҕа өрөспүүбүлүкэ хас да төгүллээх чөмпүйүөнэ, Илин Уһук эрэгийэҥҥэ ММА призера Алексей Никифоров сырдык кэриэһигэр “Боотурдар оонньууларын” — “Zema” Саха сирин ыччатын уонна устудьуоннарын улуустарын холбоһуга хаһыс да сылын успуорт төрүт көрүҥнэригэр ыччат турнирын тэрийэн ыытар.
Сүрүн бириис 200 тыһ солк. Өрөспүүбүлүкэ улуустарыттан уонна Дьокуускай куораттан барыта холбоон 16 хамаанда муһунна. Бу турнирга улуус аайыттан биэс саамай күүстээх уолаттар хамаанда туруоран, спорт төрүт көрүҥнэригэр илин-кэлин түсүһэллэр. Быйыл Амматтан, Анаабыртан, Бүлүүттэн, Горнайтан, Кэбээйиттэн, Мэҥэ Хаҥаластан, Намтан, Ньурбаттан, Сунтаартан, Уус Алдантан, Үөһээ Бүлүүттэн, Дьааҥыттан, Хаҥаластан, Чурапчыттан, Эбээн Бытантайтан уонна Дьокуускайдааҕы педагогическай кэллиэстэн кытталлар.
Ыспыраапка
“Боотурдар оонньуулара” – 2015 сыл бэс ыйын 16 күнүгэр “Петуховка” сөтүөлүүр сиригэр ууга түспүт оҕону быыһаары суорума суолламмыт дэгиттэр ыспарсымыан Алексей Никифоров сырдык кэриэһигэр анаан ыытыллар. Алексейы доҕотторо таптаан Өлөксөй дииллэр. Өлөксөй элбэх өрөспүүбүлүкэтээҕи, Арассыыйатааҕы, Уһук Илиҥҥи, норуоттар икки ардыларынааҕы күрэхтэһиилэр кыттыылаахтара, кыайыылаахтара этэ. “Дабаан” диэн Кэбээйи ыччатын түмсүүтүн бэрэссэдээтэлинэн үлэлээбитэ. Күрэхтэһии кэмигэр Өлөксөй хаартыскаларынан видеоклип оҥорон мустубут дьоҥҥо көрдөрдүлэр. Боотурдар бары саҥата суох туран доҕордорун чиэстээтилэр. Алексей ааспыт сылларга бу оонньууларга өрүү ситиһиилэхтик кыттара. Кини аатын үйэтитэргэ бу турнир улахан кылаат буолар. Санатан эттэххэ, Алексей доҕотторо туруорсаннар, Дьокуускайга эрчиллэр тренажердардаах, өйдөбүнньүк таастаах сквер туттарбыттара.
Күрэхтэһии биллэр уонна саҥа саҕалааччы ыспарсымыаннары түмтэ. Кинилэр ортолоругар Дыгын оонньууларын кыттыылаахтара Леонид Филиппов, Алексей Уваровскай, национальнай ыстаныыларга Саха сирин муҥутуур кыайыылааҕа Яков Дмитриев уонна да атыттар бааллар.
Онтон Чурапчыбыт улууһуттан Юрий Копырин (тутум эргиирэ), Петр Ксенофонтов (балык былдьаһыы), Дьулустаан Калачев (өһөс торбос), Дьулустан Харитонов (мас тардыыһыта), Егор Лукин (үс төгүл үс) көрүҥнэргэ кыттыахтара.
Уолаттар успуорт аҕыс көрүҥэр киирсиэхтэрэ: тутум эргиир, өһөс торбос, сахалыы ыстаҥа, балык былдьаһыытыгар, хапсаҕай, хомуур хапсаҕай, мас уонна ханаат тардыһыыта. Хас көрүҥ аайы кыайыылаахтар быһаарыллаллар. Бастыҥ хамаанданы уопсай баалынан таһаараллар. Кыйыылаах хамаанда 200 тыһ солк тутуоҕа, иккис — 150 тыһ солк, үһүс — 100 тыһ солк бириэмийэлэниэхтэрэ.
Боотурарга ситиһиини баҕарыаҕын!
Сэмэн Жендринскэй