Съезд Арассыыйаҕа Дьиэ кэргэн, өрөспүүбүлүкэҕэ Оҕо саас уонна Чурапчыга Ыал саргыта сылларыгар ананна.
СӨ Аҕа лигатын бэрэссэдээтэлэ Айхал Габышев, норуодунай суруйааччы Сэмэн Тумат, “Сатас” ХЭТ бэрэсидьиэнэ Иннокентий Макаров ыалдьыттаатылар. Чурапчы улууһун 400-чэкэ эр киһитэ кыттыыны ылла. Съезд саҕаланыыта эр дьон түмсүүтүн уон сыл салайан кэлбит Василий Давыдов түмүктүүр отчуотун оҥордо.
“Биһиги, эр дьон, ырааҕы анааран, кэнэҕэски ыччаттарбыт инникилэрин санаан, түмсэн, күүстээх үлэни-хамнаһы ыытыахтаахпыт. Дьиэ кэргэммитигэр эрэллээх эркин, тулхадыйбат тулааһын буолуохтаахпыт. Оҕолорбутун бэйэбит холобурбутунан иитэн, сахалыы куту иҥэриэхтээхпит”, — диэн улуус баһылыга Степан Саргыдаев бэйэтин тылыгар эттэ. Кини илиититтэн таһаарыылаахтык үлэлээбит эр дьон наҕараадаланнылар.
“Сатас” ХЭТ бэрэсидьиэнэ Иннокентий Макаров, Чурапчы нэһилиэгин “Удьуор” эр дьон түмсүүтүн бэрэссэдээтэлэ Дмитрий Слепцов, Чыаппаратааҕы “Дьэ, эрэ” эр дьон түмсүүтүн бэрэссэдээтэлэ Руслан Гоголев ханнык хайысханы тутуһан үлэлииллэрин, бэйэлэрин уопуттарыттан кэпсээтилэр. Ол кэнниттэн мустубут эр дьонтон биирдиилээн тахсан, эр киһи хайдах буолуохтааҕар, оҕону иитиигэ бэйэлэрин санааларын үллэһиннилэр.
Улуус эр дьонун түмсүүтүн саҥа састааба талылынна, бэрэссэдээтэлинэн Яков Оконешников ананна. Саҥа састаапка ЧГИФКСИ проректора Василий Давыдов, Болтоҥо нэһилиэгин баһылыга Сергей Ефремов, “Якутлесресурс” механига Дмитрий Слепцов, култуура салалтатын начаалынньыга Петр Гуляев, үөрэх салалтатын начаалынньыгын солбуйааччы Афанасий Максимов, ЧГИФКСИ уопсайын дириэктэрэ Иван Лукин, Байыаннай дьайыы кыттыылаахтарын улуустааҕы координатора Сергей Атласов, “Дорожник” ХЭТ салайааччытын солбуйааччыта Спартак Пахомов, урбаанньыттар Петр Марков, Егор Анемподистов, Алексей Ефремов, Чурапчы нэһилиэгин дьаһалтатын спортка сүрүн исписэлииһэ Михаил Степанов, Олохтоох көҕүлээһини сайыннарар агентство салайааччыта Леонид Макаров, Ис Дьыала отделыттан Петр Монастырев, ЧРОСИО тренерэ Гаврил Нохтунскай, киин балыыһаттан Дмитрий Слепцов, Росгвардия сотруднига Николай Никутов, Чурапчытааҕы аграрнай техническэй колледжтан Мэхээлэ Уйбаан Уола, “Айыллаан” НАДь исписэлииһэ Альберт Николаев, ЧРОСИО үлэ харыстабылын исписэлииһэ Семен Протопопов, Олохтоох көҕүлээһини сайыннарар агентство юриһа Владислав Горохов киирдилэр.
Съезд түмүгүнэн резолюцияны ылыннылар. Эр дьоҥҥо анаан, сүүйүүлээх оонньуу ыытылынна. Улуус баһылыга туруорбут сүрүн бирииһин — убаһаны Амматтан сылдьар ЧГИФКСИ устудьуона сүүйдэ. Үөрүүлээх тэрээһин түмсүү оһуохайынан түмүктэннэ.
Елена Макаринская
