Ол иһин, “үчүгэй булчут туһаҕар син биир туох эмэ иҥниэхтээх” дииллэринии мэлийиэ суохтаах этибит. Чурапчы улууһа бу дойду таһымнаах кыһыҥҥы экстремальнай сүүрүүгэ син биир кыһыл көмүс мэтээлгэ тиксиэхтээх этэ!
Эрдэ, эрдэтээҥҥи чөмпүйүөммүт Василий Лукин быйылгы дьыллаахха сүүрэ барбатын истэн бараммын испэр хайдах эрэ хомойо санаабытым. Онтон ити киэһэликуу бэтэрээн сүүрүктэр тустарынан ыстатыйаны таһааран бараммыт эмиэ хайдах эрэ ытырыктата санаан эрдэхпинэ,
Мугудай нэһилиэгэр олорор, аҕам Красноярскай куоракка бииргэ үөрэммит табаарыһа Егор Артемьев, бүгүҥҥү Бэчээт күнүнэн эҕэрдэлээн баран: “Бииргэ төрөөбүт быраатым Дмитрий Артемьев, Өймөкөөҥҥө тиийэн 5 биэрэстэҕэ чөмпүйүөннээтэ”, — диэн олус үөрүүлээх сонуну иһитиннэрдэ.
Онтон Егор Егоровичтан өссө үчүгэйдик чуолкайдаһан билбитим, биир дойдулаахпыт, балет улахан, СӨ норуодунай артыыһа, РФ уонна СӨ үтүөлээх артыыһа Чурапчы улууһун олохтооҕо Дмитрий Егорович Артемьев, Чурапчытын аатыттан кыттан, 69 саастарыгар диэри сүүрүк эр дьоҥҥо 5 биэрэстэ уһуҥҥа биэтэккэ бастакынан кэлэн чөмпүйүөн үрдүк аатын ылбыт.
Быйылгы, алтыс төгүлүн ыытыллыбыт марафон Улуу Кыайыы өрөгөйдөөх 80 сылыгар ананна, ол онон сиэттэрэн, Дмитрий Егорович кылбар кыайыытын аҕатыгар, Аҕа дойду Улуу сэриитин 2-с истиэпэннээх уордьан кавалера, “Керчь оборуонатын иһин” мэтээл хаһаайына, Керчь уонна Севастополь куораттары босхолооһуҥҥа аатырбыт Таманскай горно-стрелковай дивизия хорсун байыаһа Егор Никифорович Артемьевка (1924-1999) анаата.
Биир дойдулаахпытын улахан кыайыытынан эҕэрдэлээн биэриэҕин!
Сэмэн ЖЕНДРИНСКЭЙ