Ааспыт өрөбүллэргэ Өймөкөөн улууһугар VI-с төгүлүн “Өймөкөөн — тымныы полюһа” кыһыҥҥы экстремальнай марафон-сүүрүү буолан ааста. Манна дойду 16 эрэгийиэниттэн, өрөспүүбүлүкэ 13 улууһуттан бэйэлэрин кыахтарын билиммит марафонецтар тиийэн кытыннылар.
Сааһынан хааччахтааһын суох — 18-тан 70 сааһыгар диэри 5 биэрэстэттэн саҕалаан, 50 биэрэстэҕэ тиийэ, быһата, ким баҕалаах бэйэтин тустаах дистанциятын талан сүүрдэ.
5 көһү сүүрүүгэ 18-39 саастаахтарга 1-кы миэстэҕэ — 36 саастаах Николай Марков ( Челябинскай к.), 2-кэ Москваттан 37 саастаах Вячеслав Нигай, 3-кэ Юграттан 39 саастаах Николай Трифонов тигистилэр.
5 көһү 40-49 саастаахтарга Өлүөхүмэттэн 41 саастаах Александр Моедо, 2-кэ — Владимирскай уобаластан 40 саастаах Аркадий Прытков, 3-кэ — Курскайтан 40 саастаах Александр Барков таҕыстылар. 5 көһү сүүрүүгэ Москаттан 50 саастаахтарга былырыын алтынньыга 50 сааһын туолбут триатлоҥҥа успуорт маастарыгар кандидат Москва куорат олохтооҕо Антон Долгов 1-кы миэстэни ылла. 2-с миэстэни Москваттан Алексей Трафимов, 3-с миэстэни Сыктывкартан Сергей Огородников ыллылар. 5 көһү сүүрүүгэ уопсайа үс киһи бастаабыт: Николай Марков (Челябинскай к.), Александр Моедо (Саха сирэ, Өлүөхүмэ улууһа) уонна Антон Долгов (Москва к.). Кинилэртэн 3:42,24 абсолютнай бириэмэни көрдөрөн, Өлүөхүмэттэн сылдьар РФ успуордун маастара Александр Моедо VI-с “Өймөкөөн — тымныы полюһа” кыһыҥҥы экстремальнай марафон-сүүрүү кыайыылааҕынан буолла. Быйылгы дойду таһымнаах ыспартыыбынай тэрээһиҥҥэ Чурапчы улууһун ыспарсымыаннара ох курдук оҥостон тиийэн кытыннылар.
Чурапчы улууһун бэтэрээн сүүрүктэрин салайааччы Егор Константинович Абрамов суолталаах тэрээһин туһунан санаатын маннык үллэһиннэ: “Оройуоммутуттан 11 буолан кыттыыны ылан кэллибит. Үүммүт дьылга Улуу Кыайыы өрөгөйдөөх 80 сылын көрсө биир сүрүн былааммыт туолбутуттан улаханнык астынныбыт. Сылдьарбыт тухары эдэр ыччаттарбытыгар үтүө холобоуру, чэгиэн олоҕу, ыарахаттартан чаҕыйбат, туруоруммут сыалы ситиһиллэрин көрдөрөгө дьулуһабыт. Тымныы салгыннаах Өймөкөөҥҥө барыта холбоон 147 биэрэстэни сүүрэн, үөрэн-көтөн түмүктээтибит. Барыыбытыгар-кэлиибитигэр күүс-көмө, өйөбүл буолбут улууспут баһылыгар Степан Саргыдаевка, улуус дьаһалтатын успуорка управлениетын начаалынньыга Дьулустан Егоровка, улуустааҕы социальнай харалта салайааччытыгар Лидия Тоукаеваҕа, айаммыт суоппарыгар Дмитрий Евграфовка дириҥ махталбытын биллэрэбит”.
Сэмэн ЖЕНДРИНСКЭЙ