Биир дойдулаахтара Семен Гаврильевич Егоровы итинник убаастаан ааттыыллара. Оччолорго кини 17-с сылын сибээс эйгэтигэр Маралаайы почтатын отделениетын начаалынньыгынан үлэлиирэ.
1966 сылга коммунистическай үлэ удаарынньыга аатын ылбыта. Сибээс үрдүкү тэрилтэтиттэн, ССКП райкомун бүрүөтүттэн уонна оройуоннай сэбиэт толорор кэмитиэтиттэн Бочуотунай грамоталарынан наҕараадаламмыта.
“Хаһыаты, сурунаалы – ыал ахсын! – бу этиини, Семен Гаврильевич үлэлээбит отделениета Мугудай нэһилиэгэр букатыннаахтыы олоххо киллэрбитэ. Холобура, 1969 сыллаахха сурутуу былаана 5000 солкуобай эбит буоллаҕына, кинилэр алтынньы ый түмүгүнэн 4437 солкуобай сууммалаах сурутууну номнуо ыытан олороллоро. Ол иһигэр “Кыым” – 152, “Эдэр коммунист” – 113, “Саҥа олох” – 151 ахсаанынан этилэрэ.
Онон ыал ахсын, дьон аайы саҥа сонуну, кэрэ кэһиини, үөрүүлээх сураҕы тиэрдээччи кини – Семен Егоров этэ.
Сэмэн ЖЕНДРИНСКЭЙ