Дональд Трамп бэйэтин уһун, киэҥ далааһыннаах олоҕор иккис төгүлүн Америка холбоһуктаах штаттарын Бэрэсидьиэнин дуоһунаһыгар үктэннэ. Инньэ гына бэйэтин судаарыстыбатын 47-с Аҕа баһылыгынан буолла. Бу иннинэ кини АХШ Бэрэсидьиэнин дуоһунаһыгар 2017-2021 сылларга үлэлээбитэ.

АХШ Бэрэсэдьиэнин инаугурацията, Москуба бириэмэтинэн үс чаас анараа өттүгэр Капитолия үктэлигэр саҕаламмыта. Үөһэ дуоһунастаах ыалдьыттар олорор сирдэригэр туруоруллубут үрдүк тырыыбынаттан Бэрэсидьиэн бэйэтэ тыл эттэ. Көрөөччүлэр аатырар Юнион-искибиэртэн саҕалаан, Джордж Вашингтон монуменыгар диэри икки биэрэстэ кэриҥэ усталаах сиргэ тэнийэн турдулар.  Ол эрэн Трамп бу сырыыга халлаан тымныытыттан сылтаан тэрээһин үөрүүлээх чааһын Капитолия саалыгар ыытарга быһаарынна. Бу күн  тоҕо эрэ Вашингтоҥҥа  -4-14С кыраадыс тымныйда.

Инаугурация кэмигэр Дональд Трамп мустубут дьону “сиэрдээх буолуу өрөбөлүүссүйэтигэр” ыҥырда. Кини дуоһунаһын бастакы күнүгэр 100 дьаһалга илии баттыырын туһунан, республиканец былаанын билээччилэр CNN иһитиннэрдилэр. Онтон Reuters сигэтинэн 200-кэ дьаһалга диэн бигэргэттэ. “Систиэмэ эйгэтигэр көһүтүллүбэтэх өрүтүнэн буолуоҕа”, – диэн саҥардыы талыллыбыт Бэрэсидьиэн сүбэһитэ тэлэбиидьэнийэҕэ эттэ. Манна даҕатан эттэххэ, Трамп бэйэтин тылыгар Арассыыйа уонна Украина сыһыаннаһыыларын туһунан ханан даҕаны ахтыбата.

 

Сэмэн ЖЕНДРИНСКЭЙ