Екатерина Петровна Савватеева орто үөрэхтээх эмчит идэтин ылбыт күн бэҕэһээҥҥи курдук өйдүүрэ. Ол 1933 сыллаахха этэ.

Эдэр үлэһити Бахсы медпуунугар үлэҕэ анаабыттара. Оччолорго медпункт Бахсыга саҥа аһыллыбыт кэмэ этэ. Саҥа аата саҥа, үгүс тэриирдээҕэ, үлэлээҕэ. Ыарыһахтары эмтээ, ырааһырдар-чэбдигирдэр үлэтэ ыыт. Оччолорго үөрэҕэ суохтары үөрэхтээһинтэн эмчиттэр даҕаны туора турбат этилэрэ.

Итиннэ акушерканан уон сыл үлэлээбитэ. Екатерина Петровна илиитин иһинэн ааспыт оҕолор кэлин бэйэлэрэ ыал ийэлэрэ, аҕалара буоллахтара. Бука, сорохторо кырдьаҕас акушерканы көрөн да билбэттэрэ буолуо…

Онтон Мэҥэ Хаҥаласка Майа балыыһатыгар үлэлээбитэ. 50-с сыллар бүтүүлэриттэн биһиги оройуоммутугар харах ыарыыларын эмтиир диспансер үлэлии сылдьыбыта. Ол онно Екатерина Савватеева медсестранан, наада буоллаҕына, ардыгар бырааһы да солбуйара.

1967 сыллаахха биэнсийэҕэ тахсар сааһа туолбута. Ол ырааппыт кырдьар саас даҕаны кинини таптыыр идэтиттэн тэйиппэтэҕэ. Үлэтигэр хаалбыта.

Екатерина Петровна уопсастыбаннай үлэҕэ көхтөөхтүк кыттара. Олохтоох Сэбиэт дьокутаатынан, норуодунай сэтээтэлинэн хаста да талылла сылдьыбыта. Бииргэ үлэлиир табаарыстарыгар үтүө, истиҥ сыһыаннааҕа, хаһан баҕарар киниттэн сүбэлэтэллэрэ.

Күндү, тапталлаах ийэ этэ. Сэбиэскэй былаас аҕалыы көмөтүнэн, тус бэйэтин кыһамньытынан соҕотоҕун үс оҕону ииппитэ. Улахан кыыһа Марианна Омскайдааҕы тыа хаһаайыстыбатын үнүстүүтүн бүтэрбитэ. Үөрэҕин кэнниттэн Ленин аатынан колхуоска агрономунан үлэлээбитэ. Уола Петр Омскайдааҕы физкултуурунай үнүстүүтү, оттон кыра кыыһа Лида Москубаҕа педагогическай үнүстүүтү ситиһиилээхтик бүтэрэннэр үлэ дьоно буолбуттара.

Норуот доруобуйатын харыстабылын кырдьаҕас үлэһитэ өс сыллаах эҥкилэ суох үлэтин баартыйа уонна судаарыстыба үрдүктүк сыаналаабыттара. Екатерина Петровна Савватеева “Үлэҕэ килбиэнин иһин”, “1941-1945 сылларга Аҕа дойду Улуу сэриитигэр килбиэннээх үлэтин иһин” мэтээллэринэн, Саха АССР Үрдүкү Сэбиэтин Президиумун Бочуотунай грамотатынан наҕараадаламмыта.

Кэлин Бахсытааҕы ФАП-ҥа дьон-сэргэ үйэтин уһууругар туруулаһан туран үлэлээбит быраас Екатерина Петровна Савватеева аатын иҥэрбиттэрэ.

 

Сэмэн ЖЕНДРИНСКЭЙ