Үөрүүлээх тэрээһин Дьокуускайга Оҕо тыйаатырыгар буолла.
СӨ Култуура уонна духуобунай сайдыы миниистирэ Афанасий Ноев, АЛРОСА хампаанньа толорор былааһы кытта үлэҕэ отдел начаалынньыга Владимир Аргунов, Опера уонна балет тыйаатырын дириэктэрэ Владислав Левочкин уонна Чурапчы улууһун култуура салалтатын начаалынньыга Петр Гуляев, Хоптоҕо нэһилиэгин баһылыга Алексей Бурцев, кини үөрэнээччилэрэ, аймахтара кыттыыны ыллылар.
Ил Дархан этиитинэн 52,62 караттаах алмааска Аксения уонна Наталья Посельская ааттарын иҥэрдилэр. Алмаас куопуйатын үөрүүлээх быһыыга-майгыга туттардылар.
Сыл устата Аксения Посельскаяҕа анаммыт элбэх тэрээһин буолара күүтүллэр.
Аксения Посельская — саха бастакы балерината, талааннаах педагог, туруорааччы-хореограф, тэрийээччи, өрөспүүбүлүкэҕэ хореографическай үөрэхтээһини төрүттээччи. Кини үҥкүү култууратыгар, балет ускуустубатыгар уонна хореография үөрэхтээһинигэр киллэрбит кылаата туохха да кэмнэммэт.
Елена Макаринская