Бүгүн о.э. ыам ыйын 29 күнүгэр, Хатас нэһилиэгин “Тускул” култуурунай киинигэр “Танец объединяет нас” диэн доруобуйаларынан хааччахтаах дьоҥҥо бальнай үҥкүүгэ өрөспүүбүлүкэтээҕи инклюзивнай куонкурус буолан ааста. Тэрээһин 9 улуустан 26 үҥкүү пааратын түмтэ.
Дьүүллүүр сүбэ бэрэссэдээтэлинэн биллэр диэйэтэр, СӨ култууратын туйгуна Николай Терютин үлэлээтэ.
Манна “Сеньоры” диэн категорияҕа иккис миэстэни Чурапчы улууһун Хоптоҕо нэһилиэгиттэн Александр Собакин уонна Валентина Новгородова ыллылар.
Оттон иккис бөлөххө Екатерина Федорова уонна Иннокентий Пермяков олус үчүгэйдик кытыннылар.
Бу икки паараны Дириҥнээҕи музыкальнай оскуола дириэктэрэ Аял Прокопьевич Новгородов дьарыктаан, иилээн-саҕалаан илдьэ сырытта.
Санатан эттэххэ, бу сылын аайы ыытыллар улахан куонкурус ааспыт сылга Мэҥэ Хаҥалас улууһугар ыытыллыбыт эбит буоллаҕына кэлэр 2025 сылга Уус Алдан Бороҕонугар буолара былааннанна.
Сэмэн Жендринскэй