Бүгүн о.э. тохсунньу 16 күнүгэр Уйбаан Доосо аатынан Дирин орто “АГРО” оскуолатыгар 2023 сыллаахха биллэриллибит “АГРО-23” сыл үөрүүлээх түмүгэ өрөспүүбүлүкэ таһымнаах ыытылынна.
Дириҥ оскуолатын иитэр-үөрэтэр хайысхата — хас биирдии үөрэнээччи идэтин таба талан, талаанын сайыннаран олоххо бигэ туруктаах үктэнэригэр олук уурар. Ол курдук оскуола выпускниктара ситии-хотуу аттестатын таһынан, тоҕус араас идэни баһылаабыттарын туоһулуур сибидиэтэлистибэлэри туталлар. Маны таһынан биһиги оскуолабыт учууталлара, маастардара Саха өрөспүүбүлүкэтин идэҕэ урутаан бэлэмнээһин киинин кытта сөбүлэҥ түһэрсии түмүгэр, “Профи-Дирин дистанционнай оскуола” бырайыак чэрчитинэн биир бастакынан өрөспүүбүлүкэ араас улуустарын үөрэнээччилэрин идэҕэ үөрэтэр кыахтаннылар. Ол курдук бүгүн куйаар ситимин нөҥүө Үөһээ Дьааҥы улууһун Боруулаах орто агрооскуолатын, Хаҥалас улууһун С. П. Ефремов аатынан Булгунньахтаах орто оскуолатын, Чурапчы улууһун Г.П. Башарин аатынан Сылаҥ орто оскуолатын, С.Я. Эрилик-Эристиин аатынан Чакыр орто оскуолатын, Одьулуун орто оскуолатын үөрэнээччилэрэ иккис разрядтаах оператор ЭВМ, В категориялаах тракторист, 4 разрядтаах көстүүм художнигын идэтин ылбыттарын туоһулуур судаарыстыбаннай сибидиэтэлистибэлэри ыллылар.
Үөрүүлээх түгэҥҥэ оскуолабыт 9 кылааһын үөрэнээччилэрэ талбыт идэлэрин баһылыылларыгар, саҥа сатабыллары иҥэринэллэригэр, үс сыл ситиһиилээхтик үөрэнэллэригэр тирэх буолар сочуотунай киниискэлэри дириэктэр Михаил Игнатьев тутарда.
Бүгүҥҥү күн биир долгутуулаах түгэнинэн, самаан сайын үтүө күннэрин санатар нэһилиэк “Айар күн” ыччаттарын уопсастыбаннай бөлөҕө “Бырыы” документальнай киинэтин презентациялааһына буолла. Киинэ 2023 сыл сайыныгар оҕолор, оскуола иһинэн тэриллибит “Маарыкчаан” үлэ-сынньалан лааҕырыгар биир сезон, биир күнүн олоҕун кердүлэр. Түмүккэ дохсун ытыс тыаһынан ааптардар махтаннылар.
Тэрээһин үөрүүлээх чааһыгар сайын лааҕырга сылдьан үлэлээбит, дьарыктаммыт, сынньаммыт оҕолору чиэстээһин ыытылынна. Манна оҕолор лааҕырга сылдьыбыт түгэннэрин кэпсээн, ахтан-санаан аастылар. Ол кэннэ дириэктэри иитэр үлэҕэ солбуйааччы Т.И. Попова лааҕыр олоҕор көхтөөхтүк кыттыбыт оҕолорго махтал суруктары, сэмэй бэлэхтэри туттардылар.
Дьоро күммүт, үөрэнээччилэр төгүрүччү олорон гитаралаах ырыаларынан түмүктэннэ.
Бу күн, куйаар ситимин нөҥүө, СӨ Идэҕэ урутаан бэлэмнээһин киин дириэктэрин солбуйааччы А.В. Ноговицын, С. П. Ефремов аатынан Булгунньахтаах орто оскуолатын дириэктэрэ А.П. Тимофеев, Боруулаах орто агрооскуолатын дириэктэрэ З.Н. Божедонова, Чурапчы улууһун салайааччылара уонна үөрэнээччилэрэ кыттыыны ыллылар. Ону таһынан Чурапчы улууһун үөрэҕин салаатын сүрүннүүр исписэлииһэ, улуус агрооскуолаларын эппиэттээх үлэһитэ Д.А. Илларионов, нэһилиэк баһылыгын солбуйааччы Е.В. Адамов кэлэннэр эҕэрдэлээтилэр, баҕа санааларын эттилэр.
Тэрээһин кыттыылаахтара инникитин да маннык оҕо-аймах сайдарыгар ыытыллар үлэлэр үксүү, ситиһиилэнэ турдуннар диэн санаанан салайтаран үөрэн-көтөн тарҕастылар.
Саргылана Тарасова, дириэктэри научнай үлэҕэ солбуйааччы
Бэлэмнээтэ Сэмэн Жендринскэй