Сэтинньи 16 күнүгэр Хоптоҕо нэһилиэгэр тыа хаһаайыстыбатын күннэрин чэрчитинэн, олохтоох дьаһалтаны кытары бииргэ “Тыа хаһаайыстыбатын инники сайдыыта” диэн тиэмэлээх воркшоп ыытылынна.
Тэрээһиҥҥэ билиҥҥи кэмҥэ Хоптоҕоҕо олус таһаарыылаахтык үлэлии-хамныы сылдьар дьон түмүстүлэр. Ол курдук, олохтоох дьаһалтаҕа тыа хаһаайыстыбатын исписэлииһэ Ольга Решетникова, кэтэх бааһынай хаһаайыстыба салайааччыта Лира Васильева, Иван Федосеев-Доосо аатынан Дириҥ орто агро оскуола бэтэрээн учуутала, кэтэх бааһынай хаһаайыстыба салайааччыта Светлана Осипова, оскуолаҕа биология уонна химияҕа учуутала Клавдия Дьячковская, оскуола төрөппүттэрин кэмитиэтин бэрэссэдээтэлэ Валентина Петрова, оскуола иһинээҕи бизнес-инкубатор киин салайааччыта Лена Луковцева көхтөөх кыттыыны ыллылар. Итиэннэ тыа хаһаайыстыбатын салаатыгар бэйэлэрин үлэлэрин сырдаттылар.
Үөрэнээччилэр бука бары олус болҕомтолоохтук иһиттилэр. Тэрээһин иккис чааһыгар бэйэлэрэ бырайыак оҥорорго холоннулар. Оҕолор сүрүннээн түөрт тиэмэҕэ үлэлээтилэр: сылгыны иитии ( сал. Лира Ивановна), сүөһүнү иитии (сал. Светлана Петровна), тыа хаһаайыстыбатыгар түргэнник ситэр көрүҥнэри иитии (сал. Валентина Николаевна) уонна тигээйини иитии (сал. Клавдия Андреевна). Хас биирдии тиэмэҕэ, кэлбит ыалдьыттар үөрэнээччилэргэ көмөлөһөн сүбэ-ама буолуллар.
Бырайыактар оҥоһуллан бүппүттэрин кэнниттэн, бөлөҕүнэн тахсан үлэлэрин көмүскээтилэр. Үөрэнээччилэр саха төрүт дьарыгын инники олоххо суолу тобулан, сэмэй бырайыактарынан дьоһуннаах хардыыны оҥордулар.
Воркшоп бырайыак “Төрүттэрбит дьарыктарын сүтэрбэккэ, иилээн-саҕалаан сайыннарыаххыт диэн эрэнэбит. Биһиги норуоппут ураты хайысхата буоларын умнумаҥ!” – диэн кэлбит ыалдьыттар алгыс тылларынан түмүктэннэ.
Сэмэн Жендринскэй