Муус устар 12-15 күннэригэр Санкт-Петербург куоракка мас тардыһыытыгар Дойду первенствотыгар Иван Федосеев-Доосо аатынан Дириҥнээҕи агро-оскуолатын туйгун үөрэнээччитэ Альмира Макарцова Саха сирин сүүмэрдэммит хамаандатын састаабыгар киирэн ситиһиилээхтик кыттан кэллэ.
“Альмира, 60 киилэҕэ диэри ыйааһыҥҥа бочуоттаах үһүс бириистээх миэстэҕэ тахсан, мас тардыһыытыгар Арассыыйа оҕолорго сүүмэрдэммит хамаандатыгар киирэн барыбытын улаханнык үөртэ уонна долгутта.
Чаҕылхай ситиһиилээх кэлбит кыыспытын уонна кини тириэньэрин Георгий Федорович Пугачеву бэҕэһээ оскуола иһинэн чиэстээтибит, дохсун ытыс тыаһынан эҕэрдэлээтибит.
Эдэр, кэскиллээх ыспарсымыаммытын улуус үөрэҕин управлениятыттан, Чурапчытааҕы оҕо ыспартыыбынай оскуолатыттан Светлана Захарова, Чурапчы улууһун дьаһалтатын физкултуураҕа уонна успуорка управлениятын салайааччыта Дьулустан Егоров кэлэн эҕэрдэлээн бардылар. Ону таһынан оскуола администрацията, Дириҥнээҕи оҕо музыкальнай оскуолата, Хоптоҕо нэһилиэгин дьаһалтата, олох-дьаһах хомунаалынай хаһаайыстыба Дириҥнээҕи тэрилтэтэ, бииргэ үөрэнэр оҕолоро эҕэрдэлээтилэр, сэмэй бэлэхтэрин туттардылар. Төрөппүттэригэр Ирина Васильевна, Николай Анатолиевич Макарцовтарга оҕону иитиигэ, сайыннарыыга ураты болҕомтолоругар элбэх махтал тыллары эттилэр.
Онтон төрөппүттэр, тириэньэригэр Георгий Федоровичка улаханнык махтаннылар, иитиллээччитин тириэньэр быһыытынан сыһыанын олус истиҥник ахтан бэлиэтээтилэр. Альмира өссө үрдүк ситиһиилэри көрдөрүө, төрөөбүт оскуолатыгар кыайыы өрөгөйүн аҕала турарыгар эрэнэбит”, — диэн Арассыыйа призерын кылааһын салайааччыта Марфа Николаевна Далбаева кэпсээтэ.
Сэмэн Жендринскэй