Олунньу 10-11 күннэригэр, Хоптоҕо, Хадаар нэһилиэктэригэр Эрилик Эристиин аатынан Кубок олохтоммута 10, итиэннэ Эрилик Эристиин аатынан сопхуос тэриллибитэ 50 сылларыгар анаммыт волейболга өрөспүүбүлүкэтээҕи улахан турнир буолла.
Эрдэ суруллубутун курдук, 8 хамаанда күрэхтэстэ: Амма, Таатта, Мэҥэ Хаҥалас, Нам уонна Дьокуускай куораттан, Чурапчы улууһуттан иккилии хамаанда кытыннылар. Турнир үөрүүлээх арыллыытыгар, улуус баһылыга Степан Саргыдаев: “Бу тэрээһиннэринэн сибээстээн Чурапчы улууһун волейболга бэдэрээссийэтин бэрэссэдээтэлигэр Михаил Кириллиҥҥэ, Эрили Эристиин аатынан сопхуос түөрт нэһилиэктэрин – Хоптоҕо, Хадаар, Хайахсыт, Чакыр баһылыктарыгар улахан өйөбүлгүт иһин барҕа махталбын тиэрдэбин!” – диэн эттэ.
Икки күннээх тыҥааһыннаах күрэхтэһиини, улуус дьаһалтатын успуорка управлениетын начаалынньыга Дьулустан Егоров кыраҕатык кэтээн көрдө, тэрийээччилэргэ, ыспарсымыаннарга успуорт управлениетын аатыттан дириҥ махталын биллэрэр. Бэлиэтээн эттэххэ, Чурапчы улууһун сүүмэрдэммит хамаандатыгар, Хоптоҕо нэһилиэгин баһылыга Алексей Бурцев бастакы нүөмэринэн оонньоото.
Турнир түмүгүнэн анал бириистэри туттардылар:
“Бастыҥ оонньооччу” – Таатта улууһуттан Олег Малышев;
“Бастыҥ көҕүлээччи” – Дьокуускай куораттан Тум-фа-ли Василий;
“Бастыҥ көмүскээччи” – Чурапчы улууһуттан Иннокентий Филиппов;
“Бастыҥ либеро” – Дьокуускай куораттан Бэргэн Иванов;
“Бастыҥ сибээстээччи” – Таатта улууһуттан Иван Потапов;
“Кэскиллээх оонньооччу” – Чурапчы улууһуттан Вова Филиппов;
“Туһалаах оонньооччу” – Чурапчы улууһуттан Игорь Афанасьев;
“Көрөөччү биһирэбилэ” бириис – Нам улууһуттан Эркин Киров.
Хамаанданан түмүккэ – Эрилик Кубогын кыайыылааҕынан Таатта улууһун хамаандата ааттанна, үрүҥ көмүс мэтээли Дьокуускай куорат хамаандата ылла онтон боруонса мэтээл Чурапчы улууһун хамаандатыгар хаалла. Бастаабыт хамаанда Кубогы таһынан 100 тыһ. уу харчынан бириэмийэлэннэ, иккис миэстэҕэ 80 тыһ.солк., оттон үһүс миэстэҕэ 50 тыһ.солк туттарылынна.
Сэмэн Жендринскэй