Икки бүк үөрүүлээх түгэн, бүгүн Саха сирин Судаарыстыбаннаһын күнүгэр Хоптоҕо нэһилиэгин олохтоохторугар буолла. Ол курдук, 25 сылтан тахса кэм устата туруорсуллан үлэҕэ киирбит, саҥа эмтиир куорпус үөрүүлээх арыллыытын сиэригэр-туомугар кытынныбыт. Балыыһа уораҕайа, Дойдубут Бэрэсидьиэнэ Владимир Путин көҕүлээһининэн “Доруобуйа харыстабыла” национальнай бырайыак чэрчитинэн тутулунна.
Түөрт нэһилиэги хабар балыыһа, Хоптоҕо нэһилиэгин киинигэр, билиҥҥи дьаһалта дьиэтинэн кэннинэн турар. Уопсай иэнэ 230 кв.миэтэрэ, манна дьон-сэргэ көрдөрүнэрин таһынан, ыарыһахтар үрдүттэн сытаннар эмтэнэллэригэр, анализ туттаран, сүрэхтэрин көрдөрүнэр усулуобуйалара тэрилиннэ.
Тэрээһин үөрүүлээх чааһыгар “Чурапчы улууһа” МТ баһылыга Степан Саргыдаев, Прокопий Сокольников аатынан Чурапчытааҕы киин балыыһа кылаабынай бырааһа Николай Сивцев, Хоптоҕо нэһилиэгин баһылыга Алексей Бурцев, СӨ доруобуйатын харыстабылын министиэристибэтин ресурснай киин дириэктэрин солбуйааччы Владимир Шестаков, Семен Ананьев аатынан Хоптоҕотооҕу эмтиир амбулатория сэбиэдиссэй-бырааһа Олеся Иванова, ССРС доруобуйатын харыстабылын туйгуна, Хоптоҕо нэһилиэгин бочуоттаах олохтооҕо Данил Павлов кыттыыны ыллылар.
“Хоптоҕо нэһилиэгэ” МТ баһылыга Алексей Леонидович бэйэтин эҕэрдэ тылыгар, Дойдубут Бэрэсэдьиэнигэр Владимир Путиҥҥа, СӨ Ил Дархана Айсен Николаевка, СӨ Бырабыыталыстыбатыгар, Чурапчы улууһун баһылыгар Степан Саргыдаевка, СӨ Ил Түмэн дьокутаатыгар Павел Пинигиҥҥэ, улуустааҕы киин балыыһа кылаабынай бырааһыгар Николай Сивцевка билиҥҥи уустук кэмҥэ өйөбүллэрин иһин дириҥник махтанна.
Үөрүүлээх тэрээһин иккис чааһа, олохтоох норуот айымньытын дьиэтигэр буолла. Манна урукку сылларга Хоптоҕо балыыһатыгар үлэлээн ааспыт убаастабыллаах бэтэрээннэр, нэһилиэк уопсастыбаннаһа кыттыыны ыллылар, балыыһа салалтата кинилэргэ өр сыллаах эҥкилэ суох үлэлэрин иһин үрдүк сценаҕа наҕараадалары туттарда. Нэһилиэнньэ күүһүнэн эҕэрдэ кэнсиэрди көрдөрүлэр.
Сэмэн Жендринскэй. Ааптар хаартыскаҕа түһэриитэ