Ааспыт нэдиэлэҕэ Аҕа дойду Улуу сэриитэ түмүктэммитэ 79 сылын көрсө уонна Бүтүн Арассыыйатааҕы “Дорога к обелиску” аахсыйа чэрчитинэн Иван Федосеев-Доосо аатынан Дириҥ орто агро-оскуолатын 7 кылааһын үөрэнээччилэригэр (сал. И.В. Макарцова) анаан гражданскай-патриотическай тэрээһин ыытылынна.
Тэрээһин бастакы чааһыгар оскуола үөрэнээччилэрэ, Хоптоҕо нэһилиэгин баһылыгын солбуйааччытын Егор Адамовы кытта көрүстүлэр. Егор Владимирович ыччаты патриотизм тыыныгар иитии олус суолталааҕын, олох сыаннастарын, майгы-сигили төрүттэрин, оҕо кыра сааһыттан саҕалаан төрөөбүт дойдутун таптыахтааҕын, харыстыахтааҕын, патриотическай тыыны иҥэринэн сайдан тахсыахтааҕын туһунан сиһилии кэпсээтэ.
Салгыы олохтоох бибилэтиэкэ үлэһитэ Марианна Толстоухова “Дорога к обелиску” аахсыйа устуоруйатыттан, бу хамсааһын суолтатын туһунан сырдатта уонна “Стоит на страже Родины солдат” диэн кинигэ быыстапкатын билиһиннэрдэ.
Тэрээһин түмүктүүр чааһыгар оҕолор, нэһилиэк киинигэр турар Аҕа дойду сэриитин кыттыылаахтарыгар анаммыт пааматынньыкка тахсаннар хаар ыраастааһыныгар үлэлээтилэр.
Сэмэн Жендринскэй