Өрөспүүбүлүкэ ааҕааччылара биир астынар, кэтэһэр сурунааллара — “Байанай” быйылгы 2025 сыллааҕы сурутааччыларын ортотугар сүүйүүлээх оонньуу түмүгүн таһаарда.
Барыта холбоон 26 сүрүн бириис өрөспүүбүлүкэбит араас муннуктарыгар олорор дьоҥҥо тигистэ. Кинилэр ортолоругар, Чурапчы нэһилиэгин олохтооҕо, Валентина Николаевна Дьячковская буолла. Үгүс киһи “хайалара буоллаҕай?” диэххит.
Кинини дьон-сэргэ таптаан, ытыктаан Биэнсийэ Валя диэн ааттыыллар. Почта үлэһитэ үрдүттэн улахан сүүйүүнү туппутун билэммит, бэйэтин кытары бэрт кыратык сэһэргэстибит: “Сүүйүү туһунан социальнай ситим нөҥүө көрөн билбитим эрээри, чуолкайын, тугун-ханныгын билбэккэ сылдьыбытым. “Байанай” сурунаалга наар кэргэним Александр Егорович суруттарар ол эрэн почтаҕа үлэлиирим быһыытынан бу сырыыга бэйэм ааппынан ыыппытым. Лиссиэнсийэ туһунан этэр буоллахха, аҕабыт улахан булка оччо-бачча сылдьыбат ол оннугар түөрт уолаттардаахпын, бултууллар онон арааһа кинилэргэ аныырбыт буолуо. Сурунаалы таһынан “Саҥа олох” улууспут итиэннэ “Кыым” өрөспүүбүлүкэбит хаһыаттарыгар суруттарабыт”.
Сэмэн ЖЕНДРИНСКЭЙ