Муус устар 9-10 күннэригэр Туймаада хочотун Дьокуускайдааҕы 13-с нүөмэрдээх орто оскуолатын баазатыгар, өрөспүүбүлүкэҕэ эбии үөрэхтээһин педагогтарын икки ардыларыгар “Сүрэхпин оҕоҕо аныыбын” (“Сердце отдаю детям”) куонкурус өрө күүрүүлээхтик буолан түмүктэннэ.
Икки күн устата барыта холбоон 41 кыттааччы аҕыс хайысханан күрэхтэстилэр. Чурапыбыт улууһуттан түөрт бастыҥ педагог тиийэн кытынна, ол курдук физкултуурунай-ыспартыыбынай хайысхаҕа ДЮСШ бокса-тириэньэрэ Николай Павлов 2-с степеннээх дипломунан, техническай хайысхаҕа Семен Новгородов аатынан Чурапчы орто оскуолатын эбии үөрэхтээһинин педагога Надежда Захарова 2-с степеннээх дипломунан бэлиэтэннилэр, настаабынньык хайысхаҕа Елена Сивцева бэйэлэрин маастарыстыбаларын көрдөрдүлэр.
Оттон уус-уран хайысхаҕа кыайыылааҕынан ааттанан, финалга тахсан “Туллукчаан” уһуйаан педагога, музыкальнай салайааччыта Диана Портнягина I-кы степеннээх лауреат буолары ситистэ
итиэннэ онлайн куоластааһын түмүгүнэн “Көрөөччү биһирэбилэ” анал аат кыайыылааҕынан буолла. Инньэ гынна Диана Дмитрьевна аны күһүн Уфа куоракка ыытыллар Бүтүн Арассыыйатааҕы куонкуруска кытта барар сүбэ-суругу тутта.
Сэмэн Жендринскэй